Трое беларусаў загінулі і яшчэ двое пацярпелі ў аўтааварыі, якая здарылася ў горадзе Бярэзнікі ў Пермскім краі Расіі. Пра гэта паведамляе БЕЛТА са спасылкай на прэс-службу МЗС. Цяпер дыпламаты займаюцца вывучэннем сітуацыі. Яны атрымалі ад мясцовых уладаў адказ на запыт і асабістыя дадзеныя беларусаў, якія трапілі ў аўтакатастрофу. Вядома, што беларусы знаходзіліся ў Пермскім краі па службовых справах.
Інфармацыя пра здарэнне з’явілася ў расійскай прэсе са спасылкай на ўпраўленне МУС Расіі па Пермскім краі. 27 траўня ў 19.50 аўтамабіль “Міцубісі”, за рулём якога быў мужчына 1988 года нараджэння, раптоўна выскачыў на сустрэчную паласу і сутыкнуўся з аўтобусам МАЗ. Кіроўца машыны і двое яго пасажыраў загінулі на месцы. Яшчэ двое пасажыраў атрымалі пашкоджанні і былі дастаўленыя ў лякарню. Траўмаваныя таксама двое пасажыраў аўтобуса.
Па факце здарэння праводзіцца праверка.