Ад пачатку сакавіка ў Мінску на незаконныя звальненні скардзіліся каля 30 чалавек. Такую лічбу назвала прэс-служба Мінгарвыканкама ў сваім Telegram-канале.
Паведамляецца, што часцей за ўсё гаворка ішла пра звальненне па пагадненні бакоў. Было таксама некалькі выпадкаў, калі прыватныя наймальнікі прапаноўвалі работнікам звальненне па пагадненні бакоў, хоць насамрэч гаворка ішла аб скарачэнні.
У траўні ў Мінску было зарэгістравана каля 400 новых беспрацоўных. 29 з іх — людзі, звольненыя па пагадненні бакоў. Праблемнымі галінамі у сталіцы лічацца індустрыя забаў, гандаль і паслугі, гатэльны і рэстаранны бізнесы.
10 чэрвеня Аляксандр Лукашэнка заявіў, быццам прыватныя наймальнікі звальняюць работнікаў, якія не хочуць падпісвацца за альтэрнатызных кандыдатаў. Ён даручыў разабрацца са звальненнямі ў прыватнікаў за апошнія тры месяцы. Пазней старшыня ЦВК Лідзія Ярмошына патлумачыла, быццам ім прыйшоў адзін такі ананімны ліст і яны яго правяраюць.
Дарэчы, заяву Віктара Бабарыкі пра парушэнні з боку ініцыятыўнай групы Аляксандра Лукашэнкі і прымушэнне да подпісаў за вылучэнне кіраўніка дзяржавы ЦВК адмовілася разглядаць, бо тыя сведчанні... былі ананімнымі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.