Рэклама наркотыкаў на прыпынку "Праспект Газеты Праўда" / Еўрарадыё
У Мінску цэлы раён вакол станцыі метро "Міхалова" распісалі рэкламай наркотыкаў. Аб'явы нанесеныя праз трафарэт на слупы і прыпынкі, кожны дзень іх бачаць тысячы мінакоў, сярод якіх — вучні школы №26 на вуліцы Льва Сапегі.
У рэкламе — назва телеграм-канала. Звязацца з яго ўладальнікам можна за некалькі клікаў. Робім гэта, і пераконваемся, што мінчукам сапраўды прапаноўваюць рабіць "закладкі" — раскладваць наркотыкі па ціхіх месцах. За такую "працу" на падставе часткі 3 артыкула 328 можна атрымаць да 15 гадоў пазбаўлення волі.
Размова з наркадылерам (ён прадстаўляецца Кірылам) пачынаецца з яго пытанняў: "Прывітанне, горад і ўзрост? Адкуль пра мяне даведаўся?"
Тлумачым. І адразу ж атрымліваем падрабязныя інструкцыі:
Інструкцыя выглядае проста і зразумела. Не дзіўна, што ў абарот наркотыкаў уключаецца ўсё больш і больш людзей — у "барыг" усё адпрацавана да дробязяў.
Далей "Кірыл" паведамляе нам умовы допуску да "працы":
Залог — 5000 расійскіх рублёў (каля 160 беларускіх рублёў) трэба перавесці на карту. І ўсё.
"Не задавальняе, не адцягвай маю ўвагу. Задавальняе — уладкоўвайся. Матэматыка простая", — падганяе наркадылер.
Так, гэтая прапанова працы можа апынуцца банальным махлярствам: "наркадылер" знікне, як толькі атрымае грошы на карту. Але правяраць, так гэта ці не, мы не сталі.
Убачыўшы рэкламу, знайшоўшы телеграм-канал і выканаўшы інструкцыі, мінскі падлетак можа ператварыцца ў "закладчыка" за некалькі хвілін. Чаму ўлады нічога не робяць?
Недалёка ад месца, дзе зробленае фота аб'явы, знаходзіцца некалькі "апорак" — пунктаў аховы правапарадку. Бліжэйшы, АПАП №46 на вуліцы Алібегава, 25, размешчаны ўсяго ў 500 метрах.
У Мінскгарсвятле у нас некалькі хвілін ўдакладняюць, на якіх канкрэтна слупах размешчаныя аб'явы, уздоўж тралейбусных ліній ці на асвятляльных слупах. Тлумачым, што рэкламы шмат — і на слупах, і на прыпынках. Нас злучаюць па іншым нумары. Зноў тлумачым.
— І вы прапануеце нам іх зафарбаваць? — пытаецца жанчына, выслухаўшы наш расказ.
— Ну, так, было б някепска!
— Ну, так, някепска! У дзесяць градусаў марозу! — незадаволеная наша суразмоўца. — Але што ж рабіць... Гэта які адрас? Добра, майстру перададзім.
Але затым аказваецца, што за слупы з тралейбуснымі лініямі адказвае не Мінгарсвятло, а Мінсктранс! Нам прапануюць патэлефанаваць туды.
Яшчэ тры тэлефанаванні, і мы атрымліваем нумар супрацоўніка філіяла Мінсктранса, які займаецца ў тым ліку абслугоўваем апор кантактных ліній.
Для арыенціроўкі ён просіць нас выслаць фатаграфію аб'явы, пытаецца, на якіх вуліцах яшчэ была заўважаная рэклама, і таксама абяцае разабрацца.
Выснова. Калі вы бачыце рэкламу наркотыкаў на мінскіх слупах — тэлефануйце спачатку ў прыёмную Мінгарсвятла (+375 17 2180808), а потым у прыёмную "Службы энергагспадаркі" Мінсктранса (+375 17 2469751), калі аб'явы размешчаныя на апорах кантактнай сеткі. Званок у райаддзел міліцыі таксама не будзе лішнім.
PS: Халодным вечарам 24 студзеня рэклама наркотыкаў ўсё яшчэ заставалася на прыпынках і слупах. Як і раніцай 25 студзеня. Больш за тое, каля ўваходаў на станцыю метро "Міхалова" з'явіліся новыя аб'явы. Фарба свежая — трафарэтчык працуе ў прамежку паміж 22:00 і 22:30. Але ў справах аб распаўсюджванні наркотыкаў, якія будуць распачатыя ў дачыненні да хлопчыкаў і дзяўчынак, якія клюнулі на аб'явы, ён, як і дылер Кірыл, хутчэй за ўсё, будзе праходзіць як неўстаноўленая асоба.