Беларуская акцыя ў Літве / ELTA
У Літве сёлета плануюць праверыць больш за 18 000 беларусаў, якія атрымалі ў краіне дазвол на жыхарства да 2022 года — да ўведзеных тады абмежаванняў і праверак.
Усім давядзецца запоўніць апытальнік, які цяпер запаўняюць беларусы, якія прыязджаюць у Літву. "Мы зоймемся праверкай усіх беларусаў, якія атрымалі від на жыхарства ў Літве па працы да таго, як пачалі выкарыстоўваць апытальнік. У Літве такіх беларусаў каля 18 000, да 20 000", — перадае delfi.lt словы кіраўніцы Дэпартамента міграцыі Эвеліны Гудзінскайце.
Калі на чалавека знойдуць негатыўную інфармацыю, Дэпартамент міграцыі звернецца ў спецслужбы.
"Незапаўненне анкеты будзе расцэньвацца не на карысць такіх асобаў. А калі Дэпартамент дзяржбяспекі давядзе, што чалавек уяўляе пагрозу, то яго пазбавяць дазволу на жыхарства", — кажа Гудзінскайце.
Грамадзяне Беларусі і Расіі абавязаныя з лістапада 2022 года запаўняць анкету, адказваючы ў тым ліку на пытанні пра стаўленне да вайны ва Украіне.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут