Пра тое, што Беларусь падала ў МАГАТЭ заяўку на правядзенне ацэнкі Астравецкай АЭС міжнароднымі экспертамі (місія SEED) беларускім і літоўскім журналістам яшчэ ў красавіку паведаміў намеснік галоўнага інжынера Беларускай АЭС Уладзімір Горын.
Спецыяльныя місіі SEED ацэньваюць выбар будаўнічай пляцоўкі для ўзвядзення атамных аб'ектаў. "Місія SEED ў нас запланаваная. Вядома, такой задачы перад намі не стаяла, але раз нас абавязалі правесці SEED-місію ― яна будзе праведзена", ― гаварыў Горын. Запрасіць спецмісію МАГАТЭ для ацэнкі выбару Астравецкай пляцоўкі неаднаразова патрабавалі беларускія і літоўскія экалагічныя арганізацыі, паведамляе БелаПАН.
25 ліпеня ў СМІ з'явіліся паведамленні, што 10 ліпеня падчас выпрабавальнай трэніровачнай ўстаноўкі корпуса рэактара 330-тонны агрэгат сарваўся і ўпаў ўніз з вышыні ад 2 да 4 метраў. Генпадрадчык будаўніцтва станцыі ― расійская група кампаній "АСЭ" ― паспяшалася абвергнуць інфармацыю аб здарэнні на АЭС, назваўшы яе "не адпаведнай рэчаіснасці". Беларускае Мінэнерга гэтую інфармацыю часткова падцвердзіла.