У Беларусі зацверджаны падрабязны пералік імпартных тавараў, якія павінны праходзіць дзяржаўную санітарна-гігіенічную экспертызу. Пералік прыняў галоўны санітарны лекар краіны сваёй пастановай №47 ад 10 верасня 2015 года ў развіццё ўрадавай пастановы №666.
У пералік тавараў, якія павінны праходзіць такую экспертызу, трапілі практычна ўсе прадукты харчавання — ад хлебабулачных вырабаў і гарбаты да морапрадуктаў і алкагольных напояў. Таксама ў спісе шмат пазіцыяў у раздзеле “Тавары дзіцячага асартыменту” — тут і вопратка для дзяцей, і канцылярскія тавары, і сродкі гігіены, і дзіцячая мэбля.
Сярод іншых груп тавараў — матэрыялы для водазабеспячэння, касметычная прадукцыя, бытавая хімія, мэбля і будматэрыялы, паведамляе afn.by
Як раней растлумачылі чыноўнікі, правядзенне санітарна-гігіенічнай экспертызы не прывядзе да значнага падаражэння імпартнай прадукцыі. Аднак самі імпарцёры выказваюць занепакоенасць такім новаўвядзеннем і просяць адмяніць урадавую пастанову.
Фота: БЕЛТА