У бабруйскай калоніі — успышка пнеўманіі? Што кажуць супрацоўнікі ПК-2 і лекары

Чытаць болей: Праваабаронцы прызналі палітвязнямі яшчэ 11 чалавек

— Ды глупства, ніякай пнеўманіі няма, паверце мне! — адказвае на гэта супрацоўніца юрыдычнага аддзела. — Ва ўсіх усё добра — працуюць пацаны, усё нармальна. Ніякай эпідэміі, не верце інтэрнэту. Там можна такое вычытаць, ад чаго будзеце потым кепска спаць.

І наогул, зняволеных добра тут лечаць. Паверце мне, не ў кожнай бальніцы так будуць лячыць.

Ніякіх лекаў не трэба. Грэюцца на сонейку хлопцы — прычым усе. Не хвалюйцеся. Усіх іх абслугоўваюць, забяспечваюць. Дзяцей у школе так не забяспечваюць, я вам скажу. Усе дагледжаныя і "досмотренные", паверце.

Цэнтральная бальніца Бабруйска: "У нас не хопіць умоў кожнаму забяспечыць ахову"

— Калі будзе зусім дрэнна, зняволеных завязуць у бальніцу на хуткай і паставяць побач з імі ахову, — кажуць нам у калоніі.

Тэлефануем у цэнтральную бальніцу.

На пасту інфекцыйнага аддзялення пра зняволеных з пнеўманіяй нічога не чулі і кажуць, што калі б іх прывезлі, пра гэта б усе гаварылі.

— У нас ніякіх указанняў на гэты конт не было, — адказвае дзяжурны доктар з прыёмнага аддзялення пасля размовы з кіраўніцтвам. — Начмед мне сказала, што звычайна ў такіх выпадках доктар калоніі тэлефануе ёй, і яны вырашаюць гэтыя пытанні. Але наогул яны іх там пакідаюць усіх на месцы. У нас не хопіць умоў кожнаму забяспечыць ахову.

Таксама ўсё залежыць ад таго, якая пнеўманія і якой цяжкасці. Калі сапраўды нейкі складаны выпадак і ёсць успышка — нам кажуць. Пакуль, як мне сказалі, з намі ніхто не звязваўся і ні пра якую ўспышку пнеўманіі не было нават размовы. Мне не сказалі, ці ляжаць зняволеныя ў медчастцы калоніі, ці не, але сказалі, што ў выпадку чаго ў асноўным іх пакідаюць там — у іх ёсць свае ложкі.

Бальніца хуткай медыцынскай дапамогі: "Калі што — тэлефануйце, паглядзім па спісах"

Пасля размовы з лекарамі і супрацоўнікамі калоніі Еўрарадыё звярнулася да праваабаронцаў, на канале якіх была апублікаваная навіна пра хворых зняволеных:

— Нам кажуць, што ніякай успышкі пнеўманіі няма.

— У сваіх крыніцах мы ўпэўненыя, — адказваюць праваабаронцы.

Чытаць болей: Фільм пра палітзняволеную ў РБ трапіў у конкурсную праграму кінафестывалю ў ЗША

Выходзіць, што зняволеныя хварэюць, але дзе іх лечаць, ніхто не ведае. Куды тэлефанаваць, калі ад вашага блізкага ні слыху, ні дыху, а ў калоніі не кажуць, хворы ён ці не, таксама зусім незразумела. Як быць?

Тэлефануем у бальніцу хуткай медыцынскай дапамогі. І раптам аказваецца, што ўсіх хворых з калоніі, якія маюць патрэбу ў шпіталізацыі, рэгіструюць менавіта тут. Далей, калі ёсць неабходнасць, пацыентаў вязуць у цэнтральную бальніцу, а калі там месцаў няма — прывозяць у бальніцу хуткай дапамогі.

— Я не ведаю, ці ёсць у нас цяпер пацыенты менавіта з гэтай калоніі, ці не, у мяне — проста спісы, — кажуць у прыёмным аддзяленні. — Нейкія зняволеныя ляжаць у хірургіі, але з чым — не скажу. Пару дзён таму бачыла, што па бальніцы хадзіла ахова. Палаты для зняволеных у нас ёсць. Пра ўспышку пнеўманіі я нічога не чула.

Такім чынам, калі раптам у сваякоў зняволеных ёсць асцярогі, што іх блізкія хварэюць, калі ласка, тэлефануйце ў прыёмнае аддзяленне бальніцы хуткай медыцынскай дапамогі. Трэба будзе назваць дадзеныя верагоднага пацыента, і калі яго тут зарэгістравалі, вам адкажуць.

—  Яны не шыфруюцца, усе гісторыі ў нас, але каб праверыць, ці ёсць чалавек у спісах, ці не, нам трэба абавязкова ведаць яго прозвішча, імя і імя па бацьку, — папярэджваюць дактары.