Пашпарт / БЕЛТА
Атрымліваць дазвол у органах унутраных спраў на выезд за мяжу для пастаяннага пражывання неабавязкова. Якіх-небудзь санкцый за ігнараванне гэтай працэдуры не прадугледжана, піша "Наша Ніва". Чытач рэсурсу патэлефанаваў у адзін з мінскіх аддзелаў грамадзянства і міграцыі з пытаннем, каму і для чаго трэба атрымліваць гэты дазвол.
Супрацоўніца міграцыйнай службы патлумачыла, што атрымліваць такі дазвол мае сэнс, калі грамадзянін Беларусі захоча аформіць у іншай краіне дазвол на пастаяннае пражыванне (ПМЖ). Такі штамп у пашпарце пацвердзіць, што на радзіме ў заяўніка не засталося даўгоў. Акрамя таго, спрашчаецца рашэнні і шэрагу пытанняў, звязаных з маёмасцю. У прыватнасці, танней абыдзецца перасячэнне мяжы на набытым у іншай краіне аўтамабілі. Калі штампа-дазволу ў пашпарце не будзе, то падатак пры ўездзе ў Беларусь, са слоў супрацоўніцы АГіМ, будзе "вар'яцка вялікім".
"Некаторыя грамадзяне толькі дзеля гэтага афармляюць дазвол на ПМЖ. У такім выпадку яны становяцца нерэзідэнтамі Рэспублікі Беларусь і падатак плацяць мінімальны — не такі, як рэзідэнты", — прыводзіць яе словы чытач.
Юрыст праваабарончага цэнтру "Вясна" Павал Сапелка раней у камэнтары "Радыё Свабода" таксама адзначыў, што нічога нечаканага ў пастанове ўраду, якая зацвярджае парадак афармленьня выезду, няма. Падобныя нормы былі ў законе і раней. Ён падкрэсліў, што "гаворкі пра нейкія дазволы не ідзе, гэты працэс тычыцца менавіта афармлення дакументаў — перш за ўсё пашпарта, у які ўносяцца адпаведныя адзнакі". Пастанова ўрада была апублікаваная на гэтым тыдні. Яно прапісвае парадак афармлення выезду для пастаяннага пражывання за межамі Беларусі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут