Гродзенская міліцыя пачала справу за экстрэмізм супраць музыкі Алеся Дзянісава. Лідар “Дзецюкоў” атрымаў па пошце копію пратакола, з якога даведаўся, што нібыта парушыў частку 2 артыкула 17.11 Кодэкса аб адміністрацыйных правапарушэннях. Гэты артыкул тычыцца “вырабу і/ці распаўсюду, а таксама захоўвання з мэтай распаўсюджвання экстрэмісцкіх матэрыялаў, калі ў гэтых дзеяннях няма складу злачынства”.
Да адмінстрацыйнай справы прывяло тое, што Алесь Дзянісаў зрабіў перапост са старонкі анархістаў у сацыяльнай сетцы “ВКонтакте”, піша сайт “Гарадзенская вясна”.
Зараз гэтая старонка, адкуль рабіў перапост Алесь Дзянісаў, заблакаваная. Праверыць, ці сапраўды быў перапост, немагчыма.
Позваў у суд Алесь Дзянісаў не атрымліваў.
Раней мы пісалі, што невядомыя, прадстаўляючыся міліцыянтамі, тэлефанавалі музыку дахаты. Аднойчы адзін з такіх суразмоўцаў натрапіў на непаўнагадовую дачку музыкі і пачаў ёй распавядаць пра справу ў дачыненні да бацькі. Дзяўчынка моцна спужалася.