Разгляд крымінальнай справы расіянкі Сафіі Сапега пачнецца 28 сакавіка ў Гродзенскім абласным судзе. Пра гэта Бі-Бі-Сі расказаў адвакат сям'і Антон Гашынскі.
Дзяўчыну затрымалі 23 траўня 2021 года разам з Раманам Пратасевічам, зняўшы іх з прымусова пасаджанага ў Беларусі рэйса Ryanair.
Спярша яе абвінавацілі ў адміністраванні "экстрэмісцкага" тэлеграм-канала "Чорная кніга Беларусі", дзе публікуюцца асабістыя даныя сілавікоў. Потым стала вядома, што Сафіі выставілі абвінавачанне па сямі артыкулах крымінальнага кодэкса.
Сапега заключыла дасудовае пагадненне са следствам і выступала на дзяржаўным тэлебачанні. Тым не менш ёй пагражае шэсць гадоў зняволення.
Па словах айчыма, у снежні 2021-га яна падала Аляксандру Лукашэнку прашэнне аб памілаванні.
Праваабаронцы прызналі яе палітзняволенай.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут