На волю не выйшла старшыня незалежнага прафсаюза "Нафтана" Вольга Брыцікава, паведамляюць праваабаронцы. Яна правяла за кратамі паўтара месяца. 13 красавіка чакалася яе вызваленне. Аднак Брыцікава зноў затрыманая. У межах якой справы яе пакінулі за кратамі, пакуль невядома.
Вольгу Брыцікаву затрымалі 27 лютага ў Наваполацку на ўчастку для галасавання — за фатаграфаванне бюлетэня. За гэта суд прысудзіў ёй 15 сутак адміністрацыйнага арышту. Праз некалькі дзён жанчыну асудзілі яшчэ на 15 сутак — за антываенны надпіс на куртцы. А пасля стала вядома пра яшчэ 15 сутак — нібыта на вокнах яе кватэры былі паперы з надпісам "Не — вайне". Брыцікаву ўтрымлівалі ў часовым ізалятары Ушачаў.
Брыцікава працавала начальнікам аддзела рэалізацыі нафтапрадуктаў на "Нафтане". У жніўні 2020-га яна стала актыўнай удзельніцай пратэстаў на прадпрыемстве. 17 жніўня быў сход працоўных з удзелам тагачаснага кіраўніка Камітэта дзяржаўнага кантроля Івана Церцеля (цяпер ён — старшыня КДБ), і Вольга Брыцікава агучыла патрабаванні да ўладаў (на відэа).
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут