Старшыня упраўлення СК па расследаванні злачынстваў супраць інфармацыйнай бяспекі і інтэлектуальнай уласнасці Аляксандр Сушко расказаў журналістам падрабязнасці справы, у якой замяшаныя групоўка кібер-злачынцаў і беларускі "Прыёрбанк".
"Справа расследуецца ў супрацоўніцтве з Еўраполам. Па ёй праходзіць 130 тысяч пацярпелых. Сума нанесенай шкоды ― каля васьмі мільёнаў еўра. Адзін грамадзянін Беларусі ужо асуджаны", ― паведаміў Аляксандр Сушко.
Схема злачынцаў была наступнай: з пластыкавых карт замежных грамадзян грошы адносна невялікімі сумамі пераводзіліся на рахунак у беларускім "Прыёрбанку", адкуль ― далей, на рахункі у Кіпры і затым у Латвіі, дзе здымаліся наяўныя. Пры гэтым пра злачынства беларускія следчыя даведаліся не ад супрацоўнікаў "Прыёрбанка", а ад сваіх нямецкіх калег.
"Усё гэта адбывалася два гады таму. "Прыёрбанк" фактычна спрыяў таму, каб гэтае злачынства адбылося. На працягу чатырох месяцаў яго супрацоўнікі не паведамлялі ў праваахоўныя органы, хаця маглі самастойна зразумець, што адбываецца злачынства. Супрацоўнікі банка маглі самастойна яго спыніць. Пазней банк самастойна вярнуў пацярпелым 380 тысяч долараў", ― расказаў прадстаўнік Следчага камітэта.
Па словах Аляксандра Сушко, такія паводзіны банка значна ўскладняюць працу па своечасовым расследаванні злачынстваў. “Ёсць праблемы унутры краіны. Праблемы ва ўзаемадачыненні з банкамі. "Прыёрбанк" не прыняў дастатковых мер... У дачыненні да некалькіх супрацоўнікаў банка цяпер вядзецца справа па артыкуле "Халатнасць"”, ― сказаў Сушко.
Кіраўнік упраўлення СК таксама дадаў, што адным з фактараў, які спрыяў здзяйсненню гэтага злачынства, стала тое, што "Прыёрбанк" першым у краіне ўкараніў новую тэхналогію (гаворка пра адзін з варыянтаў эквайрынгу ― магчымасці аплаты пластыкавымі картамі), не паклапаціўшыся пра яе поўную бяспеку.
Акрамя "справы "Прыёрбанка", прадстаўнікі СК таксама расказалі пра раскрыццё дзейнасці групоўкі з Магілёва і экстрадыцыі ў Беларусь грамадзяніна Беніна, якога па запыце беларускіх следчых затрымалі ў Марока. Усе яны набывалі тавары ў інтэрнэт-крамах, карыстаючыся пры гэтым дадзенымі чужых пластыкавых карт. Магілеўчане нанеслі шкоды на суму больш за 200 тысяч долараў і ўжо атрымалі за сваю дзейнасць тэрміны ад 9 да 11,5 года пазбаўлення волі. Справа бенінца перададзеная ў пракуратуру.
"Затрыманыя лічылі, што калі красці грошы не ў грамадзян Беларусі, то адказнасці можна пазбегнуць. Яны памыляліся", ― сказала афіцыйны прадстаўнік Следчага камітэта Юлія Ганчарова.
Пасля прэс-канферэнцыі СК “Прыёрбанк” ў сваім каментарыі заявіў, што не маеінфармацыі аб парушэнні патрабаванняў заканадаўства Рэспублікі Беларусь:
”Кіраўніцтвам “Прыёрбанка” накіраваны запыт у Следчы камітэт РэспублікіБеларусь з просьбай прадастаўлення інфармацыі пра расследаванне ў межах крымінальнай справы, у якой фігуруюць супрацоўнікі банка. Інфармацыяй пра тое, што аперацыйная дзейнасць “Прыёрбанка” ажыццяўлялася з парушэннемпатрабаванняў заканадаўства Рэспублікі Беларусь мы не маем”.