Ціўтар “Кайлі Міндоўг” і Мікіта Мелказёраў / калаж Улада Рубанава, Еўрарадыё
Гістарычны праект “Кайлі Міндоўг” Мікіты Мелказёрава пачаўся са скандалу. Пасля запуску 30 жніўня на журналіста пакрыўдзілася візуальная мастачка Караліна Палякова. Бо назву прыдумала яна і тройчы казала, што забараняе яе выкарыстоўваць.
Выявілася, гэта не ўсё, што запазычыў Мелказёраў для новага праекта. Юрыстка Марыя Колесава-Гудзіліна прапаноўвае журналісту прайсці курс па ахове інтэлектуальнай уласнасці.
Еўрарадыё разабралася, што адбываецца.
— Я прыдумала “Кайлі Міндоўг”. Я ўяўляла сябе нейкай рэперкай, якая напісала трэк з панчам пра “Кайлі Міндоўг”, — расказвае Еўрарадыё мастачка. — Мы [з Мікітам Мелказёравым] проста размаўлялі, я напісала пра гэта. Ён неяк узняўся адразу. Кажа: “Слухай, ці можна гэта скрасці?”. Я сказала, канечне, не. Ведаеце, нешта прыходзіць у галаву і ўжо ўяўляеш круты кавалак свайго жыцця з гэтым імём ці крэатывам.
Я яму прапанавала, “давай я зраблю нешта іншае, як сябру дапамагу”. Ён проста сказаў “крута” і пайшоў. Праз нейкі час быў дзень каранацыі Міндоўга. І я назвалася “Кайлі Міндоўг” у ціўтары. Мікіта мне дасылае мой акаунт і кажа: “Гэты ты? А як гэта? Мы ўжо адмалявалі ўвесь фірмовы стыль для гэтай праграмы”. І я кажу: “Не, Мікіта, гэта нельга рабіць”. Праз нейкі час ён паказвае мне, як выглядае застаўка праграмы. Я абурылася і мне непрыемна проста з таго, што красці крэатывы ў сваіх супраць волі — гэта не крута.
Сам Мелказёраў пісаў: “Гісіторыя цікавая з назвай. Раскажу яе-небудзь пазней”.
— Я вельмі люблю натхняць людзей, люблю, калі ў людзей нешта сваё атрымліваецца, калі яны глядзяць на мае справы, але такое я ўжо лічу непавагай, — працягвае Караліна Палякова.
У сеціве сталі актыўна абмяркоўваць сітуацыю. З’явіліся абвіначачанні ў сэксізме, маўляў, зноў мужчына скраў ідэю ў жанчыны і лічыць гэта нармальным. Мікіта Мелказёраў заявіў у сваім Instagram, што зменіць назву.
— Мне і камандзе зусім не хацелася распачынаць чарговы канфлікт. Мяркую, нам яны не трэба сёння зусім. Я прызнаю сваю памылку і віну ў тым, што выкарыстаў назву твітара Караліны Паляковай для новага канала. Прашу прабачэння ў Караліны і людзей, якіх гэты кейс абразіў.
Меркаванні накот сэксізму — тут зусім не. Я і каманда маліны паважаем і жанчын, і мужчын. Крэатыў Караліны — цудоўны, я ў яго ўлюбіўся, але своечасова не адрэагаваў на заўвагі, і не маю права яго выкарыстоўваць надалей. Назву канала мы зменім. Буду рады, калі прапануеце свае варыянты новага нэймінга.
Тым часам гэта не ўсё, што запазычыў Мелказёраў. Карона на лога праекта — элемент працы амерыканскага мастака Жана-Мішэля Баскіі.
Юрыстка Марыя Колесава-Гудзіліна кажа, што могуць быць экспертныя сумневы, наколькі “Кайлі Міндоўг” арыгінальная назва.
— Але, калі Караліна атаясамлівала сябе з "Кайлі Міндоўг", то выкарыстанне назвы — парушэнне не толькі аўтарскага права. Тут яшчэ і парушэнне асабістых дадзеных. Бо гэта псеўданім.
Галоўная выснова, якую можна з гэтага зрабіць — людзі забываюць, што знаходзяцца на тэрыторыі Еўрапейскага саюзу і што тут адказнасць значна большая ў сувязі з парушэннем аўтарскага права.
Да выкарыстання працы Жана-Мішэля Баскіі таксама шмат пытанняў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут