Настаўніца, ілюстрацыйнае фота / unsplash.com
На грамадскае абмеркаванне вынесены праект пастановы Саўміна "Аб рэестры фізічных асоб, якія ажыццяўляюць самастойную прафесійную дзейнасць па навучанні дзяцей". Міністэрства адукацыі праводзіць абмеркаванне дакумента на Прававым форуме па 1 чэрвеня.
У пастанове прадугледжваецца, што рэпетытарствам можна будзе займацца толькі пасля пасля ўключэння чалавека ў спецыяльны рэестр. Дзейнасць без уключэння ў рэестр забараняецца.
Ведамства не хавае, што гэтае новаўвядзенне скіраванае ў першую чаргу супраць людзей, якія пацярпелі ўжо ад палітычных рэпрэсій. Цяпер іх хочуць пазбавіць магчымасці зарабляць на жыццё рэпетытарствам:
"Прыняцце праекта пастановы дазволіць мінімізаваць магчымасць ажыццяўлення самастойнай прафесійнай дзейнасці па навучанні дзяцей фізічнымі асобамі, у дачыненні да якіх уступіў у законную сілу абвінаваўчы прысуд суда за здзяйсненне злачынстваў экстрэмісцкай накіраванасці, злачынстваў, прадугледжаных артыкуламі 139, 145-147, 154, часткамі 2 і 3 артыкула 165, артыкуламі 166 — 172, часткай 2 артыкула 173, артыкуламі 181 — 182, 187, 327 — 329, 331, 332, 342-1, 343, 343-1 Крымінальнага кодэкса Рэспублікі Беларусь, незалежна ад зняцця або пагашэння судзімасці, а таксама аказання паслуг настаўніка-дэфектолага, настаўніка-лагапеда, тыфлапедагога, сурдапедагога, алігафрэнапедагога асобамі, якія не маюць адпаведнай адукацыі".
Мяркуецца, што пастанова набудзе моц праз тры месяцы пасля яе публікацыі.
Раней такі ж дзяржрэестр быў уведзены для арганізатараў культурна-масавых мерапрыемстваў. У выніку гэтым летам быў адменены шэраг фэстаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут