Рэпер Аляксей Загорын, вядомы як Сіроп, шукае для новага кліпа людзей з татуіроўкамі. Здымкі пройдуць у цэнтры Мінска. Для кліпа выбраная яшчэ не выдадзеная песня "Все в мастях".
Таксама ў кліпе будуць выкарыстаныя татуіроўкі, якія робіць Алег Навальны, брат расійскага палітыка Аляксея Навальнага. У 2014 годзе ён быў асуджаны на 3,5 гады калоніі па "Справе Іў Рашэ", якую праваабаронцы лічаць палітычна матываванай. "Пасля таго, як Алег пабываў за кратамі, ён стаў ствараць малюнкі, стылістычна звязаныя з зонай. Мы звязаліся з ім — ён сказаў, што яму падабаецца Сіроп, і даў базу дадзеных", — распавёў Еўрарадыё прадзюсар Сіропа Яўген Калмыкоў.
Каб даведацца месца і час здымкі, пішыце Яўгену Калмыкову ў Facebook Messenger.
Аляксею Загорыну 46 гадоў. У музычнай тусоўцы ён больш вядомы як Сіроп — такую мянушку яму даў у часы вучобы ў музычным каледжы будучы лідар "Ляпіса Трубяцкога" Сяргей Міхалок. У пачатку 90-х Загорын граў на саксафоне ў першым складзе "ляпісаў", потым падсеў на наркотыкі. У 1997 годзе трапіў пад суд за крадзеж і нашэнне зброі і наступныя 20 гадоў правёў у калоніях і турмах.
Вызваліўшыся з турмы ў 2017 годзе, зноў пачаў займацца музыкай: разам з бас-гітарыстам Генадзем Лаўнікам і дыджэем Андрэем Лістрадзенкавым удзельнічае ў праекце "СіРОП" — грае на гітары і чытае рэп. "Я адзіны сапраўдны гангста-рэпер з усіх, хто чытае па-руску", — заяўляе Аляксей Загорын.