Былога кіраўніка Гродзенскага абласнога ўпраўлення аховы здароўя Андрэя Стрыжака судзяць за хабар. Пракурор просіць прызначыць яму 7,5 года калоніі ўзмоцненага рэжыму з канфіскацыяй усё маёмасці, піша tut.by.
Дзяржабвінаваўца Максім Чупрыс кажа, што хоць Стрыжак не прызнаў усе эпізоды, але яго віна пацвярджаецца паказаннямі сведкаў і доказамі па справе. Агульную шкоду ад дзеянняў Стрыжака ацэньваюць у 30 тысяч долараў.
Бок абвінавачання лічыць, што чыноўнік атрымліваў хабар пераважна ад бізнэсоўцаў за своечасовы разлік па медабсталяванні, пастаўленым у лякарні ды іншыя медустановы.
Абцяжваючых або змякчальных абставінаў няма, хоць Стрыжак атрымаў станоўчую характарыстыку з месца працы.
Адвакат заяўляе, што Стрыжак не патрабаваў грошы з бінэсоўцаў, а "звычайна знаходзіў іх у перададзеных брашурах аб медтэхніцы". Па слабасці свайго характара, кажа абаронца, чыноўнік гэтыя грошы не вяртаў, пра што цяпер шкадуе.
7 лютага працягнуцца судовыя спрэчкі. Тады ж, верагодна, з апошнім словам выступіць сам Андрэй Стрыжак.
Арыштаваны чыноўнік прызнае толькі частку з заяўленых у абвінавачванні хабараў — на агульную суму каля 19,7 тысячы долараў. Гэтыя грошы ён кампенсаваў падчас следства.