Польская мяжа / x.com/Straz_Graniczna
У Варшавы для афіцыйнага Мінска ёсць канкрэтныя ўмовы па нармалізацыі адносінаў. Пра гэта ў інтэрв'ю Radio ZET заявіў намеснік міністра замежных спраў Польшчы Анджэй Шэйна.
Дыпламат пералічыў гэтыя ўмовы: "Спыненне гібрыдных нападаў, выдача забойцы польскага салдата, вызваленне зняволеных палякаў". Шэйна дадаў, што Польшча абмежаваная ў сваіх дзеяннях у дачыненні да Беларусі, бо афіцыйны Мінск адкрыта супрацоўнічае з Расіяй і варожа настроены да Украіны.
Разам з тым намеснік міністра прыгразіў узмацніць санкцыі на мяжы з Беларуссю: "Але, магчыма, калі гэтыя ўмовы не будуць выкананыя, мы зможам спыніць транспарціроўку тавараў праз Беларусь. Нам гэта таксама нявыгадна, але мы пачынаем да гэтага рыхтавацца, і Беларусь заўважае, што мы сур'ёзна да гэтага ставімся".
Міграцыйны крызіс на мяжы Беларусі з краінамі ЕС парцягваецца з вясны 2021 года. Еўрапейскія палітыкі ахарактарызавалі яго як гібрыдную атаку, арганізаваную рэжымам Лукашэнкі. 28 траўня на мяжы з Беларуссю адбыўся напад на польскага вайскоўца Матэвуша Сітэка, які памёр у шпіталі 6 чэрвеня. Паводле звестак Варшавы, на яго напаў мігрант, які дагэтуль застаецца ў Беларусі, але пасля раскрыцця можа паспрабаваць збегчы на Блізкі Усход. Польшча патрабуе яго выдачы.
Таксама польскія ўлады даўно дамагаюцца вызвалення журналіста і актывіста Саюза палякаў Анджэя Пачобута. У Беларусі ён па палітычных матывах асуджаны на 8 гадоў пазбаўлення волі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут