Першым лаўрэатам прэміі імя Наталлі Арсенневай за найлепшую кнігу паэзіі стаў Уладзімір Някляеў. Была адзначана яго кніга “Толькі вершы”. Пра гэта паведаміла журы прэміі на сваёй старонцы ў Facebook.
У спісе прэтэндэнтаў было восем прозвішчаў: акрамя Някляева гэта Віктар Жыбуль, Сяргей Прылуцкі, Міхась Скобла, Андрэй Хадановіч, Ганна Комар, Наста Кудасава, Юлія Цімафеева. У склад журы ўваходзілі Ірына Багдановіч, Лявон Баршчэўскі, Уладзімір Глазаў, Вальжына Морт, Ціхан Чарнякевіч.
Наталля Арсеннева (1903 — 1997) — вядомая беларуская паэтка, якая рабіла першыя крокі ў паэзіі ў міжваенны час у Заходняй Беларусі. У пасляваенны час жыла ў ЗША. Аўтарка тэксту рэлігійнага гімна “Магутны Божа”.