Пад Слуцкам ад укусу восаў загінула жанчына, піша мясцовае выданне kurjer.info.
Муж і жонка — жыхары Слуцка, якія прыехалі на лецішча ў вёску Мялешкі. Зранку 12 верасня мужчына стаў разграбаць салому каля хлява, і адтуль вылецеў рой восаў. Яны напалі на мужчыну: тры разы ўкусілі яго ў твар і адзін раз — у руку.
Праз нейкі час ён пабачыў, як гэты рой ляціць за жонкай, якая бяжыць з гарода. Жанчына адмахвалася хусткай, крычала, клікала на дапамогу. Мужчына схапіў дыхлафос i разагнаў іх.
Выявілася, што восы ўкусілі жанчыну чатыры разы: у раёне грудзей і ў жывот. Ёй стала кепска, жанчына стала задыхацца. Муж спрабаваў напаіць яе вадой, аднак жонка не рэагавала. Тады ён выклікаў лекара.
Лекары "хуткай" памералі жанчыне ціск, зрабілі ўкол. Аднак гэта не дапамагло: жанчына памерла. Папярэдне мяркуецца, што прычынай смерці стаў анафілактычны шок.
У гэты ж дзень на падворак прыехалі супрацоўнікі МНС, якія акуратна спалілі кучу саломы разам з асіным гняздом.
Як распавядала Еўрарадыё, напярэдадні восы напалі ў Гродна на гадаванцаў дзіцячага садка. Пяцёра дзяцей былі шпіталізаваныя.