"Не раю іншым палітычным уцекачам паўтараць". Меркаванні пра паездку Пачобута ў Беларусь

Чытаць болей: З'явіліся фота Анджэя Пачобута ў Гродне

Не буду выключаць, што з вяртаннем Анджэя Пачобута, якое пакуль выглядае "спакойным", можа пачацца больш актыўная камунікацыя з афіцыйным Мінскам, а таксама першы этап дэрадыкалізацыі сістэмы.

Але пачакаем, чым гэта вяртанне скончыцца. Пакуль, ідэалагічна, гэта на карысць уладам", — лічыць Усаў.

Раней паліталог у эфіры Еўрарадыё выказваў думку, што Пачобута могуць у Беларусі забіць расійскія спецслужбы.

Палітычны аглядальнік Аляксандр Класкоўскі ў матэрыяле для "Позірка" напісаў, што вяртанне Пачобута ў Беларусь "не стала сенсацыяй" і нагадвае, што ў яго доўгая гісторыя супрацьстаяння з рэжымам. 

"Як бачым, у асобе Пачобута рэжым сутыкнуўся з крэпкім арэшкам. І яго паездка ў Беларусь — чарговы мужны ўчынак.

Нехта ў Польшчы яго адгаворваў. Намеснік міністра ўнутраных спраў і адміністрацыі Чэслаў Мрочак адкрытым тэкстам заявіў, што вяртанне Пачобута ў Беларусь "нясе велізарную рызыку для яго", — піша Класкоўскі.

Ён параўноўвае ўчынак Пачобута з учынкам Мікалая Статкевіча, які адмовіўся быць дэпартаваным з Беларусі пасля вызвалення ў выніку намаганняў ЗША.

"Цяпер пальчатку рэжыму кідае Пачобут. Незадоўга да вяртання ў Беларусь ён сустрэўся з папам рымскім. Гэта можа служыць пэўнай страхоўкай: Мінск зацікаўлены падтрымліваць адносіны з Ватыканам. Дарэчы, менавіта Святы пасад у выніку разрулiў сітуацыю з мітрапалітам Кандрусевічам.

Але, мабыць, яшчэ мацней беларускае кіраўніцтва зацікаўлена, каб працягваліся польскі і амерыканскі трэкі, праз якія яно спадзяецца прабіць ізаляцыю на заходнім накірунку", — сцвярджае Класкоўскі.

Чытаць болей: Пачобут вярнуўся ў Беларусь, але гэта не азначае, што рэпрэсіі спыніліся — Ціханоўская

Але аглядальнік мяркуе, што ў Пачобута далей можа не пайсці ўсё гладка.

"Бо Пачобут вяртаецца не як выключна прыватная асоба — ён мае намер падтрымаць дзейнасць Саюза палякаў у Беларусі. А гэтая структура здаўна ўладам папярок горла. У супрацьвагу ёй стварылі лаяльную рэжыму арганізацыю. Але Варшава падтрымлівае менавіта апальны саюз.

І вось што цікава: яго кіраўніца Анжаліка Борыс заяўляе, што атрымала сігналы, "якія сведчаць пра тое, што ёсць магчымасці, каб дзейнасць Саюза палякаў магла быць легальнай, ён мог функцыянаваць у прававым полі ў Беларусі".

Нескладана здагадацца, што гэта сігналы ад беларускіх уладаў. І калі яны сапраўды гатовы зарэгістраваць гэты нязручны Саюз палякаў (як піша шэраг СМІ, пры ўмове рэбрэндынгу), то можна казаць пра буйную ўступку Варшаве. Пытанне: у абмен на што?", — задаецца пытаннем Аляксандр Класкоўскі.