Адзін з этапаў беларуска-расійскіх вайсковых вучэнняў "Захад-2017" праходзіць на палігоне Лужскі ў Ленінградскай вобласці.
На гэты палігон, як паведамляюць расійскія СМІ, прыбыў Уладзімір Пуцін. Паводле легенды вучэнняў, на гэтым палігоне расійскія вайскоўцы спынілі наступ ўмоўнага праціўніка, які напаў на Беларусь, перадае ren.tv.
З расійскага боку супраць незаконных фармаванняў выступілі мадэрнізаваныя танкі Т-80 і артылерыйская батарэя "Мста-С". З паветра праціўніка атакавалі штурмавікі Су-25, якія знішчылі калоны аўтамабільнай і браняванай тэхнікі. Яны дзейнічалі пад прыкрыццём пары знішчальнікаў Су-35С.
Вырашальны ўдар нанеслі рэактыўныя сістэмы залпавага агню "Смерч".
Стратэгічныя вучэнні "Захад-2017" праходзяць з 14-га па 20 верасня на тэрыторыі Беларусі і трох палігонах Расіі.