Расійскі прэм'ер-міністр Дзмітрый Мядзведзеў падчас наведвання Люксебурга выказаўся на тэму валюты саюзнай дзяржавы Беларусі і Расіі. "Бессэнсоўна казаць пра тое, дзе будзе эмісійны цэнтр, як будзе называцца валюта, пакуль не будзе праведзена сумная праца па ўзгадненні асноўных дакументаў, на базе якіх гэты саюз павінен працаваць", — цытуе яго словы ТАСС.
На прэс-канферэнцыі Мядзведзеву задавалі пытанні наконт нядаўніх рэзкіх выказванняў Аляксандра Лукашэнкі наконт інтэграцыйных працэсаў і дзеянняў Расіі. Прэм'ер лічыць, што рух да інтэграцыі Беларусі і Расіі "нармальны і слушны".
"Мне здаецца, што над гэтым трэба працаваць, а не проста гаварыць пра тое, што "відавочна Расія нічога не хоча, гэта ўсё для прыкрыцця", — гаварыў Дзмітрый Мядзведзеў. Паводле яго слоў, калі б заснавальнікі ЕС трымаліся такой жа пазіцыі, як Аляксандр Лукашэнка, "ніякага Еўрапейскага саюза не было б". Расійскі прэм'ер адзначыў, што любы саюз грунтуецца на даверы, "а не на каментарах пра тое, у чым мы кагосьці падазраем, што там прыбеглі і на вуха сказалі".
Дзмітрый Мядзведзеў лічыць, што для паглыблення інтэграцыі Беларусі і Расіі не хапае нейкіх інстытутаў, якія трэба стварыць. Але для гэтага патрэбная згода і Мінска, і Масквы. "Гвалтам туды нікога зацягнуць немагчыма", — сказаў расійскі прэм'ер.