Мінчук Дзмітрый Серада на краўдфандынгавай платформе molamola.by абвясціў збор грошай для суда супраць МУС.
"Для давядзення справы да законнага канца па выкананні нашых канстытуцыйных правоў неабходныя велізарныя сродкі на адваката і судовыя выдаткі (магчыма для пачатку каля 3 тысяч рублёў), таму буду звяртацца да грамадскасці для збору сродкаў. Першая судовая маленькая перамога ўжо запатрабавала каля 1000 рублёў. Далей трэба будзе больш сродкаў, бо атрыманы адказ з МУС паказвае, што добраахвотна кампенсаваць шкоду МУС не будзе. Гэта значыць, толькі праз суд! А на гэта неабходныя пазовы, адвакат, шмат грошай і часу і, галоўнае, ваша падтрымка!" — піша мінчук.
У выпадку перамогі ён абяцае вярнуць усе грошы ахвярадаўцам. А справаздачу па выкарыстанні сродкаў гатовы публікаваць у сацсетках.
Гісторыя Дзмітрыя Серады пачалася ў жніўні 2016 года. Тады ў яго кватэру ўварваўся АМАП. Мужчыну жорстка затрымалі на вачах у жонкі і маленькага дзіцяці. Сераду падазравалі ў эксгібіцыянізме. Аднак ужо ў дзень затрымання высветлілася, што адбылася памылка, тым не менш мужчына двое сутак правёў за кратамі.
Прадстаўнікі міліцыі адмовіліся прасіць у яго прабачэння і кампенсаваць матэрыяльныя страты па рамонце кватэры. Доктар патрабаваў пачаць крымінальную справу за незаконнае ўварванне, аднак Следчы камітэт і пракуратура не пабачылі падставаў для яе.
23 ліпеня суд Партызанскага раёна Мінска адмяніў пастанову следчага, які адмовіўся пачынаць крымінальную справу. Дакументы вернутыя ў Следчы камітэт на дадатковую праверку.