Адкрытае акцыянернае таварыства "Магілёўскі металургічны завод" не здаваў і не здае на металалом сваю гатовую прадукцыю. Пра гэта ў размове з Еўрарадыё паведаміў намеснік дырэктара па вытворчасці прадпрыемства Юрый Карпік. Раней з'явілася інфармацыя са спасылкай на звесткі, атрыманыя ад супрацоўнікаў "Магілёўдругасчармет", быццам ААТ "ММЗ" здаў на перапрацоўку гатовую прадукцыю, каб выплаціць заробкі. Па словах Юрыя Карпіка, металургічны завод сапраўды здае металалом, але гэта не прадукцыя прадпрыемства, а адкіды вытворчасці.
Юрый Карпік: "Гэта адкіды, абумоўленыя спосабам вытворчасці, якія ўтвараюцца ў працэсе вырабу трубавай прадукцыі. Адкіды пераводзяцца ў разрад "металічныя" і здаюцца ў якасці лому.
Нягледзячы на тое, што адгрузка металалому з завода выраблялася камісійна, для поўнай упэўненасці была праведзеная праверка прыналежнасці да лому ўласнымі спецыялістамі, а таксама былі прыцягнуты дадаткова яшчэ дзве незалежныя кампетэнтныя арганізацыі для правядзення экспертызы. Яны таксама пацвердзілі прыналежнасць адгружанай неадпаведнай прадукцыі да катэгорыі "металалом".
Мы абавязаныя здаваць лішкі металалому, які ўтвараецца ў вытворчасці, на нарыхтоўчыя прадпрыемствы ГА "Белдругасмет" згодна з указам прэзідэнта Рэспублікі Беларусь №179 ад 1995/05/05 "Аб мерах па ўзмацненні барацьбы з крадзяжом каштоўных, чорных і каляровых металаў, іх лому і адкідаў, каштоўных камянёў". Сродкі ад гэтага здадзенага лому пайшлі на закупку чыгуннага лому, які патрэбны нам у вытворчасці".
Таксама намеснік дырэктара па вытворчасці запэўніў, што заробак на прадпрыемстве выплочваўся і выплочваецца своечасова без прыцягнення крэдытаў, з уласных сродкаў. Рахункі прадпрыемства не арыштаваныя, як паведамлялася раней, і ніколі не былі арыштаванымі.
Магілёўскі металургічны завод — адзін з найстарэйшых прамысловых заводаў у Беларусі. Ён вырабляе сталёвыя электразварныя трубы круглага і профільнага сячэння, тэхнічны шрот (літы і колаты), люкі назіральных калодзежаў, дожджапрыёмнікі, ліцейны і пераробны чыгуны, іншае чыгуннае ліццё па заказах спажыўцоў, а таксама тавары народнага спажывання. Прадукцыя ААТ "ММЗ" адпавядае патрабаванням міжнародных стандартаў і шырока запатрабаваная на рынках Еўрапейскага саюза, краін далёкага замежжа і Расійскай Федэрацыі. Геаграфія паставак прадукцыі ахоплівае больш за 30 краін.
У чэрвені 2016 года плануецца запуск новага цэха з самым сучасным абсталяваннем па вытворчасці чарнавых восяў для чыгуначных вагонаў, а так жа паковак.
Больш падрабязную інфармацыю пра дзейнасць прадпрыемства можна атрымаць на афіцыйным сайце завода www.mmz.by.