Лявон Вольскі прэзентаваў новы альбом "Псіхасаматыка". На дыск трапілі 16 трэкаў, падзеленых паміж сабой на дзве цалкам розныя па гучанні часткі: “Горад” і “Лес”.
“Гэты альбом для мяне нязвыкла асабісты, — каментуе Лявон Вольскі. — Шмат у якіх песнях сканцэнтраваныя вельмі асабістыя думкі, пачуцці, эмоцыі і перажыванні. У ім шмат новага для мяне — у падыходзе да тэксту, мелодыі, гармоніі. І, разам з тым, шмат майго традыцыйнага. Так атрымалася, што “Псіхасаматыка” — гэта водападзел паміж тым, што было і тым, што,спадзяюся, будзе. А яшчэ дзве паловы альбома, дзве плыткі — гэта і дзве паловы беларуса: Каляды і Раство, Новы год і стары Новы год, Вялікдзень і Пасха, паганства і хрысціянства. Два бакі аднаго медаля, дзве душы”.
Уся студыйная праца была зроблена ў Вільні з нарвежскім саўндпрадзюсерам Снорэ Бергерудам, які таксама адказваў за мінулы дыск Вольскага “Грамадазнаўства”. Грошы на альбом збіралі праз краўдфандынгавую кампанію ў інтэрнэце.
Альбом выйдзе на двух CD. Набыць яго можна будзе падчас канцэртнай прэзентацыі, якая адбудзецца 3 снежня ў Вільні, у абноўленым клубе Loftas.
Квіткі каштуюць ад 65 да 110 рублёў. Набыць іх можна на сайце і ў касах Kvitki.by па ўсёй Беларусі.
Наведвальнікі канцэрта змогуць атрымаць бясплатныя аднаразовыя візы. Пакрокавая інструкцыя — тут.