31 кастрычніка Кангрэс ЗША на агульным галасаванні прыняў рэзалюцыю, якая пачынае працэдуру афіцыйнага імпічменту прэзідэнта Дональда Трампа. За адхіленне прэзідэнта ЗША ад улады выступіла большасць чальцоў Палаты прадстаўнікоў, перадае Бі-Бі-Сі.
Для прыняцця рэзалюцыі была неабходная простая большасць. За яе прагаласавалі 232 чальцы ніжняй палаты, кантраляванай дэмакратамі, супраць — 196. Чатыры дэпутаты на галасаванні адсутнічалі.
Трамп назваў прыняццё рэзалюцыі "найвялікшым паляваннем на ведзьмаў ў гісторыі ЗША".
Яшчэ ў верасні прадстаўнікі Дэмакратычнай партыі абвясцілі, што плануюць пачаць працэдуру імпічменту Трампа. Гэта адбылося пасля таго, як сталі вядомымі падрабязнасці яго тэлефоннай размовы з прэзідэнтам ЗША Уладзімірам Зяленскім.
Ананімны прадстаўнік спецслужбаў пасля гэтага падаў скаргу, быццам Трамп патрабаваў ад украінскага прэзідэнта пачаць расследаванне супраць былога віцэ-прэзідэнта ЗША Джо Байдэна. Яго, дарэчы, лічаць найбольш верагодным прэтэндэнтам на прэзідэнцкую пасаду ад Дэмакратычнай партыі на выбарах 2020 года.
Да прыняцця сённяшняй рэзалюцыі запытваць дакументы і выклікаць сведак у рамках працэдуры імпічменту мог толькі кіраўнік камітэта па справах разведкі Палаты прадстаўнікоў дэмакрат Адам Шыф і юрыдычны камітэт Кангрэсу.
Цяпер Камітэт па справах разведкі Кангрэса атрымае права апублікаваць расшыфроўкі слуханняў, якія вяліся за зачыненымі дзвярыма і да прыняцця рэзалюцыі лічыліся сакрэтнымі. Адначасова камітэт зможа праводзіць публічныя, адкрытыя для грамадскасці слуханні па пытаннях, якія дагэтуль маглі быць засакрэчаныя з меркаванняў нацыянальнай бяспекі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.