Аляксей Навальны падчас суду / Прэс-служба Масгарсуда
Прэс-сакратарка Аляксея Навальнага Кіра Ярмыш пацвердзіла смерць палітыка.
"Аляксей Навальны забіты. Яго смерць наступіла 16 лютага ў 14:17 па мясцовым часе, як напісана ў афіцыйным апавяшчэнні, выдадзеным маці Аляксея.
Супрацоўнік калоніі заявіў, што цела Навальнага знаходзіцца ў Саляхардзе. Яго забралі следчыя СК. Цяпер яны праводзяць з ім "даследаванні".
Мы патрабуем, каб цела Аляксея Навальнага было выдадзена ягонай сям'і неадкладна”, — напісала Ярмыш.
Пра смерць Аляксея Навальнага першым паведаміла ўпраўленне ФСВП Расіі па Ямала-Ненецкай аўтаномнай акрузе. Паводле ведамства, Навальны "пасля прагулкі адчуў сябе кепска, практычна адразу страціўшы прытомнасць". Папярэдняя прычына смерці — адарваны тромб.
Сям'я і каманда палітыка не верылі ў яго смерць да атрымання афіцыйнага апавяшчэння. Вядома, што ў калонію, сядзеў апазіцыянер, выехалі ягоны адвакат і маці. У той жа час зняволены, які адбывае тэрмін з Навальным, сцвярджае, што "кіпеж" у калоніі пачаўся ўвечары 15-га лютага. Ён не выключае, што смерць палітыка хавалі палову сутак ці болей.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут