"Праект Канстытуцыі", апублікаваны Каардынацыйнай радай, не мае дачынення да рэальнага праекту. Пра гэта дэпутат Палаты прадстаўнікоў Алег Гайдукевіч заявіў у каментары парталу TUT.by.
Як распавядала Еўрарадыё, напярэдадні КР апублікавала дакумент, атрыманы з уласных крыніц. У ім былі прапановы па змене Канстытуцыі.
На думку Гайдукевіча, гэта прапановы толькі ад адной з пляцовак, дзе абмяркоўваюцца магчымыя змены Канстытуцыі. "Тое, што выкінулі ў інтэрнэт, на мой погляд, гэта проста набор нейкіх прапаноў нейкі з пляцовак, на якіх па ўсёй краіне абмяркоўваюцца змены ў Канстытуцыю. Таму што я не бачу ў гэтым дакуменце ні сістэмы, ні логікі. Тым больш, Там няма важных палітычных прапаноў: пераразмеркавання паўнамоцтваў паміж прэзідэнтам і парламентам, змены выбарчага заканадаўства і іншага", — кажа дэпутат.
Ён заяўляе, што збор прапановаў ад грамадзян усё яшчэ ідзе. Гатовы праект змененай Канстытуцыі ў Палату прадстаўнікоў яшчэ не паступаў. Гадукевіч прагназуе, што праект Канстытуцыі з'явіцца напрыканцы лістапада або ў снежні.
Крыніцы TUT.by паведамілі, што дакумент, апублікаваны Каардынацыйнай радай, быў разасланы па прафсаюзах. Верагодна, яго аўтарам была афіцыйная Федэрацыя прафсаюзаў Беларусі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.