У сувязі са святочнымі мерапрыемствамі ў Мінску 7-9 траўня абмяжуюць паркоўку на некаторых вуліцах у цэнтры горада. Як паведамляе БЕЛТА са спасылкай на ДАІ Цэнтральнага раёна сталіцы, 7 траўня з 0.00 да завяршэння святочных мерапрыемстваў 9 траўня забароняць паркоўку па вуліцы Камуністычнай ад Чырвонай да Кісялёва. Таксама нельга будзе паркавацца па вуліцы Чырвонай ад праспекта Машэрава да вуліцы Камуністычнай, у тым ліку на прыдарожных паркоўках.
З 22.00 8 траўня да 23.00 9 траўня будзе забароненая паркоўка на праспекце Машэрава ад праспекта Незалежнасці да праспекта Пераможцаў, у тым ліку на прыдарожных паркоўках. Зачыняць і паркоўку на праспекце Машэрава паміж Заслаўскай і праспектам Пераможцаў, а таксама стаянку ля дома №41 на праспекце Пераможцаў (побач з хімчысткай “Ззянне”).
ДАІ нагадвае кіроўцам пра неабходнасць улічваць гэтую інфармацыю пры выбары месцаў стаянкі. У выпадку вымушанага спынення трэба пакідаць нумар свайго кантактнага тэлефона на лабавым шкле. Машыны парушальнікаў будзе забіраць эвакуатар. Жыхароў дамоў каля плошчы Перамогі просяць не дапускаць спрацоўвання аўтасігналізацыяў падчас святочных мерапрыемстваў.