Плынь кантрабандных цыгарэт у Літву паменшала ў чатыры разы / pixabay.com
Плынь кантрабандных цыгарэт у Літву скарацілася ў чатыры разы ў параўнанні з леташнімі аб'ёмамі. Пра гэта паведамляе літоўская Дзяржаўная служба аховы мяжы.
Сёлета ў першым квартале літоўцы перахапілі 416 тысяч пачкаў кантрабандных цыгарэт. За той жа перыяд 2022-га яны затрымалі 1,6 мільёна пачкаў. Кошт канфіскаваных цыгарэт у студзені-сакавіку 2023-га ацэньваецца ў 1,6 мільёна еўра.
Скарачэнне аб'ёмаў кантрабанды літоўскія памежнікі звязваюць з закрыццём чыгуначнага пункта пропуску "Стасілас".
Як распавядала Еўрарадыё, пераход Стасілас — Беняконі зачынілі 16 лютага. Гэта часовая мера — да ўсталявання ў ім інспекцыйнага комплексу са сродкамі рэнтгенаўскага кантролю. Цяпер цягнікі з Беларусі ідуць праз пункт "Кена", дзе такі комплекс ёсць.
Дарэчы, за ўвесь 2022 год літоўскія памежнікі затрымалі больш за 4,3 мільёна пачкаў цыгарэт. Кошт кантрабанды перавысіў 16,1 мільёна еўра.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут