Буйная расійская кампанія скупляе акцыі гомельскага прадпрыемства

Акцыянеры прадпрыемства "Гомелькабель" прынялі рашэнне прадаць чарговы пакет акцый расійскаму інвестару. Расіянам перайшлі акцыі на суму 132,9 тысяч беларускіх рублёў. Гэта складае 2,4% ад існага балансавага кошту актываў прадпрыемства, піша "Флагшток". Пакупнік — расійскія АТ "Атол" і ТАА "Гандлёвы дом "Людзінавакабель". Раней сёлета яны ўжо купілі пакет акцый "Гомелькабеля" на суму 170,2 тысяч беларускіх рублёў.

Першы пакет акцый гомельскага прадпрыемства (25,6%) расійскі "Атол" набыў яшчэ ў 2011 годзе. Тады ж назіральны савет прадпрыемства ўзначаліў прадстаўнік расійскага інвестара. Праз нейкі час "Гомелькабель" сутыкнуўся з сур'ёзнымі фінансавымі праблемамі. Некалі прыбытковае прадпрыемства зрабілася стратным. Кошт акцый да 2018 года ўпаў з 14 да 2 долараў. Мінарытарныя акцыянеры абвінавачвалі ў гэтым расійскага інвестара, яны выказалі здагадку, што расіяне прыйшлі на прадпрыемства, каб "выціснуць сокі". У Расіі ў інвестара ёсьць аналагічная вытворчасьць. З прыходам расіянаў тры чвэрці паставак прадукцыі "Гомелькабель" стала прыходзіцца на расійскі рынак. Прычым Гомель выконваў танныя заказы, а прыбытковыя даставаліся расійскаму прадпрыемству.

"Сэнс дагавораў у тым, каб быццам даць працу, але атрымаць для сябе максімальны прыбытак шляхам перапрацоўкі па максімальна заніжаных цэнах. Пры гэтым заводу не застаецца выручкі нават на заробкі. Мэта — у перспектыве зрабіць гомельскі завод прыдаткам "Людзінавакабеля", скараціўшы да мінімуму персанал", — мяркуе экс-дырэктар прадпрыемства Анатоль Баякоў. Пазней фінансавая сітуацыя прадпрыемства стабілізавалася. Яно зноў пачало атрымліваць прыбытак. Аднак па меры росту прыбыткаў акцыянернае таварыства пачало скупляць ўласныя акцыі і прадаваць іх расійскім інвестарам, тым самым павялічваючы іх долю ў кампаніі.

Дададзім, што "Гомелькабель" спецыялізуецца на вытворчасці правадоў, пакрытых эмаліевай, папяровай і шкловалакністай ізаляцыяй. Прадукцыя выкарыстоўваецца для вытворчасці рухавікоў.