Белтэлерадыёкампанія апублікавала на сваім сайце афіцыйны каментар да галадоўкі гукарэжысёра Уладзіміра Жолудзя.
Як паведамляла раней Еўрарадыё, мужчына абвясціў галадоўку, пратэстуючы супраць аплаты працы, якую ён палічыў несправядлівай. У прватнасці, Жолудзь заявіў, што з ім не разлічыліся за падрыхтоўку і наўпроставую трансляцыю нацыянальнага адбору на “Еўрабачанне”. Ён кажа, што каля тыдня працаваў па 13 гадзін нават без перапынкаў на абед, а атрымаў за гэта толькі 600 тыясч рублёў. На 23 лютага ён запісаўся на прыём да кіраўніка медыяхолдынгу.
Гукарэжысёр, які рыхтаваў трансляцыю “Еўрабачання”, абвясціў галадоўку (відэа)
У сваім каментары БТ паведаміла, што пры працы на палову стаўкі Жолудзь у 2015 годзе атрымоўваў сярэднямесячны заробак больш за 7 мільёнаў рублёў.
"За праект "Еўрабачанне" гэтаму супрацоўніку выплачаны ганарар у памеры 1 млн 150 тыс. рублёў. Акрамя гэтага, кіраўніцтва аддзела гукарэжысёраў хадайнічала аб прэміяванні дадзенага супрацоўніка па выніках праекта. Хадайніцтва 2016/02/10 г. падтрымана кіраўніцтвам Кампаніі — аб прэміяванні Жолудзя У.А. у памеры 1 млн рублёў", — гаворыцца ў прэс-рэлізе.
Акрамя таго, паведамляецца, што супрацоўнік жыве ў інтэрнаце, вылучаным Белтэлерадыёкампаніяй. Штомесячная плата там складае каля 100 тыс. рублёў.
"Журналісты Белтэлерадыёкампаніі, роўна як і многія мінчане, якія арандуюць камерцыйнае жыллё, напэўна, пазайздросцяць нашаму гукарэжысёру", — гаворыцца ў каментары.