Брэсцкае “Дынама” адказала БАТЭ наконт траўмы Неманьі Мілунавіча. Дынамаўцы не згодныя, што Аляксей Гаўрыловіч нанёс яе гульцу барысаўчан наўмысна.
Інцыдэнт адбыўся 14 красавіка, калі БАТЭ на “Барысаў-Арэне” абыграла аднаго з фаварытаў чэмпіянату Беларусі ў вышэйшай лізе брэсцкае “Дынама” (2:0). Мілунавіч пасля сутыкнення з Гаўрыловічам матч дайграў, але пасля яго заканчэння стала вядома пра пашкоджанне “храстковай тканіны правага каленнага сустава”. У сваёй заяве ФК БАТЭ адзначыў, што “траўму Мілунавіча складана назваць гульнявой” і спасылаюцца на відэапаўтор. Барысаўчане перакананыя: “Аляксей Гаўрыловіч наўмысна наступіў на нагу саперніку, які апынуўся на газоне”. Яны выказалі шкадаванне, што суддзя не заўважыў гэты эпізод і не пакараў дынамаўца. У той жа час ФК БАТЭ хоча “звярнуць увагу грамадскасці і судзейскага корпусу на дадзены эпізод”, каб пакараць гульца брэсцкага "Дынама". Тым больш, што Гаўрыловіч “гуляе падобным чынам не ўпершыню”.
ФК “Дынама-Брэст” выказаў шкадаванне, што гулец БАТЭ атрымаў траўму ў тым паядынку і жадае Неманьі Мілунавічу найхутчэйшага выздараўлення. Аднак дынамаўцы катэгарычна не згодныя “з адназначнай трактоўкай спрэчнага эпізоду, якую прадставілі прадстаўнікі барысаўскага клуба”. Яны лічаць, што “высновы прадузятыя і пабудаваныя на эмоцыях”.