Брэсцкае “Дынама” другі год запар заваявала Кубак Беларусі па футболе, абыграўшы БАТЭ. Матч за ганаровы трафей адбыўся 19 траўня на стадыёне “Спартак” у Магілёве.
Лік ужо на 13-й хвіліне гульні адкрыў гулец БАТЭ Мірка Іваніч. На 34-й хвіліне Арцём Мілеўскі зраўняў лік — 1:1.
Пасля перапынку на 49-й хвіліне Іваніч аформіў дубль — 2:1 і ажно паўгадзіны барысаўчане перамагалі. Аднак на 79-й хвіліне форвард “Дынама” Джоэль Фамейе забіў гол і лік стаў 2:2. А праз 10 хвілінаў, пад канец гульні, Павел Няхайчык забіў пераможны гол — 3:2.
Для “Дынама” гэта трэці Кубак Беларусі ў гісторыі клуба. Такі самы паказнік і ў БАТЭ.