Хакейнае мінскае "Дынама" развіталася са сваім капітанам Андрэем Касціцыным. За два сезоны ён згуляў 110 матчаў, закінуў 31 шайбу і зрабіў столькі ж выніковых перадач, быў другім бамбардзірам каманды. У 35-гадовага хакеіста 30 красавіка скончыўся кантракт з "Дынама" і ён пераходзіць у іншы клуб КХЛ, паведамляе прэс-служба дынамаўцаў.
"На жаль, у нас няма магчымасці ўтрымаць аднаго з лідараў беларускага хакею", — кажа гендырэктар беларускага клуба Дзмітрый Баскаў, які наракае на скарачэнне фінансавання. Высвятляецца, што і Андрэй Касціцын, і "Дынама" "былі гатовыя працягнуць супрацоўніцтва".
"Але са студзеня [2020-га] наш асноўны партнёр "Беларуськалій" прыпыніў падтрымку клуба, стварыліся даўгі па зарплатах гульцоў за мінулы сезон", — прызнаецца Баскаў. Паводле яго слоў, існуе праблема захавання ў камандзе і іншых вядучых хакеістаў.
"Проста цяпер пытанне пра бюджэт вельмі негатыўна адбіваецца на нашай селекцыйнай кампаніі ўвогуле, — распавядае гендырэктар. — Я прадпрымаю ўсе магчымыя дзеянні, знаходжуся ў пошуку крыніц фінансавання. Упэўнены, выхад будзе знойдзены".
Мінулы сезон быў правальным для мінскага "Дынама", якое стала апошняй камандай КХЛ.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.