Фота: vistanews.ru
Беларусь не збіраецца скарачаць пастаўкі паліва ва Украіну. Пра гэта са спасылкай на кіраўніка канцэрна "Белнафтахім" Андрэя Рыбакова паведамляе "Ежедневник".
"Дакладна ніякіх праблем з пастаўкамі не чакаецца. Аб'ёмы застануцца, невялікі плюс-мінус, такімі ж, як у гэтым годзе, — сказаў Рыбакоў. — У нас ёсць пэўная доля на рынку Украіны, і мы думаем яе захаваць".
На аб'ёмы паставак магла б паўплываць расійская забарона на экспарт светлых і цёмных нафтапрадуктаў, а таксама звадкаваных вуглевадародных газаў (ЗВГ) у Беларусь, які ўводзіцца з 1 лістапада 2018 года. Забарона будзе дзейнічаць да канца 2019 года.
Урад РФ рэгулярна выказваў незадаволенасць тым, што частка нафтапрадуктаў, якія пастаўляюцца з Расіі ў Беларусь у рамках Мытнага саюза без выплаты мытных збораў, рээкспартуецца ёю ў трэція краіны, а пошліны ад экспарту залічваюцца ў бюджэт Беларусі. Каб не дапускаць рээкспарту, Расія прапанавала распрацаваць баланс патрэбаў Беларусі ў нафтапрадуктах і забараніць іх пастаўку звыш гэтых прадугледжаных аб'ёмаў.
Па звестках Белстата, за 2017 год Беларусь экспартавала ва Украіну 3,2 млн тон нафтапрадуктаў (на $1,8 млрд), 225,4 тысячы тон звадкаванага газу (на $203 млн), 181,5 тысячы тон коксу і бітуму нафтавых (на $137,7 млн) і 15,6 тысяч тон вуглевадародаў ацыклічных (на $15,4 млн).