16 сакавіка кампанія Velcom прадставіла чацвёрты этап свайго праекту MOVABOX, прысвечанага папулярызацыі беларускай літаратуры. На гэты раз галоўным героем праекта стаў Андрусь Горват, якому папярэднічалі Людміла Рублеўская, Альгерд Бахарэвіч і Віктар Жыбуль.
Прэзентацыю праекта правялі ў Купалаўскім тэатры, дзе фактычна пачынаецца дзеянне кнігі “Радзіва "Прудок"”. Сам пісьменнік пры гэтым спачатку прамаўляў да публікі праз рэтра-радыёпрыёмнік, потым паўстаў на тэатральнай сцэне ў вобразе касманаўта, а затым паўтарыў свой шлях ад тэатральнага дворніка, які нанова "ўладкаваўся" на працу ў аддзеле кадраў.
"Кніга Андруся Горвата “"Радзіва "Прудок"”, якая за кароткі час пасля выхаду ў свет ужо паспела набыць амаль фенаменальную вядомасць ― жывы доказ таго, што адвечная тэма пошуку ўласных каранёў не губляе актуальнасці як для сучасных аўтараў, так і для іх чытачоў", ― сказаў кіраўнік аддзела брэнд-менеджменту Velcom Зміцер Курловіч.
Вялі прэзентацыю акцёры Купалаўскага тэатра на чале з Паўлам Харланчуком, а запрошанай зоркай стала Аліна Талай. "Кнігу Андруся Горвата я прачытала за два вечары. І быццам вярнулася ў дзяцінства, калі прыязджала да бабулі на вёску", ― сказала бягуння.
Паўдзельнічаць у новым этапе праекта MOVABOX ад сённяшняга дня можна на яго афіцыйным сайце.