Алкаеў аб прызнанні экс-сілавіка ў забойствах: яго словы трэба прымаць за праўду

Чытаць болей: Беларус уцёк на Захад і кажа, што ўдзельнічаў у забойстве генерала Захаранкі

На думку Алкаева, словы Гараўскага трэба прымаць за праўду, нават калі ён не ўсё бачыў з таго, пра што распавядае. "Пакуль возьмем ягоныя словы за аснову. А далей трэба разбірацца, праўду кажа ці не. Па-першае, ён кажа, што назаве месцы. Ад гэтага і трэба адштурхоўвацца. Я б так рабіў", — разважае экс-кіраўнік СІЗА.

Алкаеў мяркуе, што прызнанне Гараўскага магло быць інспіраванае з Масквы, каб націснуць на Лукашэнку, не даць яму зблізіцца з заходнімі дэмакратыямі. "Найхутчэй, я думаю, што Рыгоравічу старэйшыя браты з Масквы закрылі шлагбаўм на Захад. Гэта мая думка. Сядзяць разумныя людзі ў Крамлі і бачаць, што чалавек крыху там за рамкі выходзіць. Паказаць трэба было, што дарога на Захад закрытая, шлагбаўм апусціўся. Трэба адказаць на ўсе пытанні, якія паставіў гэты ўцякач", — каментуе былы кіраўнік СІЗА.

У 2001 годзе Алкаеў у СМІ прызнаўся, што паводле загаду тагачаснага міністра ўнутраных спраў Юрыя Сівакова двойчы выдаваў расстрэльны пісталет кіраўніку САХР Дзмітрыю Паўлічэнку. Супаставіўшы даты, ён выказаў здагадку, што з гэтага пісталета былі забітыя Юрый Захаранка, Віктар Ганчар і Анатоль Красоўскі. У 2002 годзе Алкаеў атрымаў палітычны прытулак у Германіі.