Ігар Станкевіч / Еўрарадыё
Ператрус у кватэры даследчыка сталінскіх рэпрэсій Ігара Станкевіча 14 ліпеня быў звязаны з ініцыятывай "Нацыя лідараў". Пра гэта паведамляюць праваабаронцы з "Віцебскай Вясны".
Ператрус праводзілі пяць-шэсць чалавек, сярод якіх былі супрацоўнікі КДБ. У знаёмых Станкевіча распытвалі пра "Нацыю лідараў". Гэтая ініцыятыва ладзіць анлайн-курсы па розных кірунках — ад грамадскага актывізму да складання ўласнага радаводу.
Паводле Станкевіча, ператрусы ў Мінску адбыліся яшчэ ў мінімум трох чалавек. Кадэбісты наведалі не толькі іх кватэры, але і кватэры іх сваякоў ці блізкіх. Прычым іх зноў цікавіла ініцыятыва "Нацыя лідараў".
У кастрычніку 2024 года ў спісе "экстрэмісцкіх фармаванняў", які складае МУС, з’явілася "экстрэмісцкае фармаванне "Ордэн". Яно нібыта вяло "экстрэмісцкую дзейнасць" праз дваровыя чаты. У адпаведным рашэнні КДБ згадваліся сайт "Нация Лидеров", Telegram-канал і Telegram-чат "Нация Лидеров", YouTube-канал "Нация Лидеров Онлайн-хаб", а таксама старонкі ініцыятывы ў Інстаграме і Фэйсбуку.
Ігар Станкевіч пакінуў Беларусь пад палітычным ціскам, цяпер жыве ў Польшчы.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут