У Мінску прайшоў кірмаш вакансій транспартных і прамысловых прадпрыемстваў. Было прапанавана больш за 400 розных вакансій. Мы прагледзелі іх усё і зрабілі для вас цікавую падборку. Даступнасць вакансій можна паглядзець на сайце "Дзяржаўнай службы занятасці".
У Мінскага метрапалітэна больш за сто вакансій. У аддзеле кадраў патлумачылі Еўрарадыё, што такая колькасць свабодных месцаў — з-за таго, што большасць маладых спецыялістаў забралі ў войска:
“Немалую частку складаюць месцы, якія вызваліліся. З-за чаго? Справа ў тым, што мы набралі маладых спецыялістаў, а іх у войска забралі, таму ў нас атрымалася так шмат свабодных вакансій. Вядома, частка людзей набіраецца і на новую, трэцюю лінію”.
Манцёр пуці — каля 45 месцаў, зарплата — 595 рублёў. Тунэльны рабочы — каля 35 месцаў, магчымая зарплата — 500 рублёў. Машыніст уборачных машын — больш за 30 месцаў, абяцаюць плаціць 430 рублёў.
Самую вялікую зарплату прапануюць камандзіру паветранага судна ў “Белавія”. Мяркуючы па патрабаваннях, прыйдзецца лётаць на адным з самалётаў сямейства CRJ. Накшталт таго, на базе якога нядаўна прэзентавалі “Танкалёт”. Патрабаванне: веданне англійскай мовы не ніжэй за чацвёрты узровень ІКАО (стандарты Міжнароднай арганізацыі грамадзянскай авіяцыі) і мець досвед працы на самалётах сямейства CRJ. Абяцаная зарплата — 12 тысяч рублёў, што складае прыкладна 5,6 тысячы долараў.
Цясляр у “Белавія”. Устрывожыліся? Супакойцеся, ён не рамантуе самалёты. Як распавялі Еўрарадыё ў аддзеле эксплуатацыі наземных збудаванняў і капітальнага рамонту, куды шукаюць спецыяліста, цясляр патрэбны для розных падручных работ:
“Як і ўвесь наш аддзел, цясляр будзе займацца падтрыманнем у працоўным і эстэтычным стане памяшканняў і будынкаў. Адрэгуляваць фурнітуру, правесці нейкі рамонт мэблі, тых жа дзвярэй. Вось для гэтага нам цясляр і патрэбны”.
Абяцаюць заробак у 600 рублёў.