Вядомую грамадскую актывістку, 72-гадовую Ніну Багінскую, якая "гуляла з плакатам", аштрафавалі на 1225 рублёў, інфармуе Радыё Свабода. Яе затрымалі 10 верасня ў цэнтры Мінска. Пенсіянерка трымала ў руках плакат "Беларусь рэпрэсаваная", якім яна пратэставала супраць судоў над удзельнікамі "Курапацкай варты" (актывісты пратэстуюць супраць дзейнасці рэстарана каля народнага мемарыялу ў Курапатах). З Кастрычніцкай плошчы Багінская збіралася ісці па ходніках праспекта Незалежнасці да будынка КДБ, але на скрыжаванні з вуліцай Энгельса яе затрымалі.
Ніна Багінская кажа, што амапаўцы звярнулі ўвагу на чырвоную свастыку, якая на плакаце пераплеценая з сярпом і молатам. Суд адбыўся аператыўна. Багінская была асуджаная за паўторнае парушэнне правілаў арганізацыі ці правядзення масавых мерапрыемстваў. Плакат ёй не вярнулі.