Жыхары Магілёва занепакоіліся з’яўленнем расійскіх сцягоў на вуліцах горада.
У суполцы “Укантакце” “Магілёў real” жыхар запытвае з якой нагоды на вуліцах абласнога цэнтра з’явіліся расійскія сцягі.
Як паведамляе mogilevnews.by, сцягі павесілі з нагоды пасяджэння Савета Міністраў Саюзнай дзяржавы, якая пройдзе ў горадзе 12 траўня.
Як раней заяўлялі ў прэс-службе Саюзнай дзяржавы, на парадку дня пасяджэння будзе 28 пытанняў. Плануецца падвесці вынікі дзейнасці Саюзнай дзяржавы, яго інстытутаў і структураў за перыяд з мінулага Саюзнага Савета Міністраў.
“Галоўным чынам засяродзімся на гандлёва-эканамічным і навукова-тэхнічным узаемадзеянні. Плануецца ўхваліць чатыры новыя праграмы, тры новыя канцэпцыі праграм, якія пасля перарастуць у праграмы. Ёсць тэмы для абмеркавання агульнага плана: дадатковыя меры па стымуляванні далейшага развіцця гандлёва-эканамічнага супрацоўніцтва”, — адзначае падчас падрыхтоўкі да мерапрыемства Дзяржаўны сакратар Саюзнай дзяржавы Рыгор Рапота.