Выхавацелям дзіцячых садкоў забаранілі на працы карыстацца мабільнымі тэлефонамі, піша "Наша ніва".
Пра гэта выданне даведалася ад чытача, які дарэмна спрабаваў датэлефанавацца да сваячкі, якая працуе ў садку №3 у Смалявічах.
Загадчыца садка Ларыса Ціток патлумачыла забарону патрабаваннем Мінадукацыі.
"Выхаваўчы працэс — гэта, натуральна, заняткі з дзецьмі. Ніхто не адбірае мабільнікі, яны пры выхавацелях. Проста лічыцца непажаданым размаўляць, сядзець у дадатках", — кажа жанчына.
Яна дадае, што вельмі строга за выкананнем забароны ніхто не сочыць: "Вы ж разумееце, што калі нешта здарылася ў чалавека, то ён і патэлефануе, і адкажа".
Раней паведамлялася, што мабільныя тэлефоны пачалі забіраць у школьнікаў падчас заняткаў. Гэта пачалося пасля таго, як у Гомелі вучні знялі на тэлефон настаўніцу, якая лаялася матам на чацвертакласніка, трымаючы над яго галавой парту.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.