Урад Нямеччыны
Урад Нямеччыны абвяргае заяву Лукашэнкі аб тым, што атручванне расійскага палітыка Аляксея Навальнага — інсцэніроўка. Пра гэта са спасылкай на прэс-службу Кабінета міністраў Нямеччыны піша РІА "Навіны".
"Само сабой, сцвярджэнне спадара Лукашэнкі не адпавядае рэчаіснасці. Учора федэральны канцлер [Ангела Меркель. — Еўрарадыё], міністр замежных спраў і міністр абароны выказалі свае меркаванні аб новых абставінах у справе аб атручванні Навальнага. Дадаць няма чаго", — цытуе агенцтва каментар прэс-службы.
Днём 3 верасня, прымаючы ў Мінску прэм'ер-міністра Расеі Міхаіла Мішусціна, Лукашэнка заявіў, што беларуская выведка мае звесткі аб інсцэніроўцы атручвання Навальнага. Маўляў, была перахопленая размова паміж Варшавай і Берлінам, з якой вынікала, што атручвання Навальнага не было. Фальсіфікацыя была арганізавана, каб "адбіць ахвоту ў Пуціна саваць нос у справы Беларусі".
Там жа Лукашэнка паабяцаў Мішусціну, што беларускія спецслужбы перададуць запіс размовы і яго расшыфроўку расійскім калегам. Аднака пакуль расіяне нічога не атрымалі.
Аляксею Навальнаму стала кепска на борце самалёта Томск — Масква 20 жніўня. Борт здзейсніў экстраную пасадку ў Омску, там палітыка шпіталізавалі.
Праз два дні Навальнага перавезлі ў берлінскую клініку "Шарытэ". А 2 верасня ўрад Германіі на падставе праведзеных даследаванняў заявіў, што Навальнага атруцілі рэчывам з групы "Навічок". У Берліне не выключаюць увядзення санкцый у дачыненні да Расіі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.