Палата прадстаўнікоў хоча прыняць закон пра замежных агентаў паводле расійскага ўзору. Пра гэта заявіў старшыня Пастаяннай камісіі Палаты прадстаўнікоў Андрэй Савіных. У аўторак ён па відэасувязі ўдзельнічаў у пасяджэнні часовай камісіі Савета Федэрацыі Расіі па абароне дзяржсуверэнітэту, піша "Расійская газета".
Савіных паведаміў, што суверэнітэт Беларусі неабходна абараніць ад вонкавага ўмяшання. Прычым пагрозы ён бачыць і ў праграмах па ўстойлівым развіцці, і ў гендарных праектах і нават у экалагічных.
"Калі мы гаворым пра ўплыў знешніх сіл на грамадскае меркаванне і парадак дня, нам вельмі цяжка ацаніць характар гэтага ўплыву, таму што вельмі часта ён маскіруецца пад класічны міжнародны грамадскі парадак дня для супрацоўніцтва. Вельмі часта ён ажыццяўляецца ў рамках праграм, якія нацэленыя на ўстойлівае развіццё, дасягненне гендэрнай роўнасці, розных праграм выратавання клімату", — заявіў Савіных.
Савіных папрасіў у расійскіх дэпутатаў падзяліцца іх напрацоўкамі ў гэтай сферы. "Я думаю, бліжэйшая задача, якая будзе стаяць перад намі, гэта прыняцце закона аб замежных агентах", — падсумаваў ён.
Кіраўнік камісіі Савета Федэрацыі па абароне дзяржсуверэнітэта Андрэй Клімаў паведаміў, што гатовы сустрэцца з беларускімі калегамі ў Маскве ці ў Мінску і падзяліцца расійскімі напрацоўкамі па абароне дзяржсуверэнітэта.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.