Забастоўка ў Германіі / dpa/picture alliance
27 лютага амаль ва ўсіх федэральных землях Германіі пачаліся папераджальныя страйкі работнікаў грамадскага транспарту.
У Берліне забастоўка пачалася а 3-й гадзіне ночы. Як паведамляе DW, працу спынілі таксама супрацоўнікі грамадскага транспарту зямлі Гесэн: грамадскі транспарт не ходзіць у Франкфурце-на-Майне, Вісбадэне, Гісэне, Марбургу, Афенбаху і Каселі.
У Баварыі двухдзённы страйк ахапіў 13 гарадоў, у тым ліку пяць самых буйных — Мюнхен, Нюрнберг, Аўгсбург, Рэгенсбург і Інгальштат. Амаль 1000 чалавек далучыліся да забастоўкі ў Саарбрукене, Нойнкірхене, Фельклінгене, Саарлуі і Мерцыгу.
У большасці рэгіёнаў не ходзяць аўтобусы, трамваі і метро. Пасажырам даводзіцца шукаць альтэрнатыўныя спосабы дабрацца да месца прызначэння.
Завяршыцца страйк павінен толькі ў ноч на 1 сакавіка.
Прафсаюзы, якія абвясцілі забастоўку, дамагаюцца істотнага паляпшэння ўмоў працы — скарачэння працоўнага тыдня і працягласці змен, павелічэння перыядаў адпачынку, а таксама павышэння надбавак за працу ў начны час і ў выходныя дні. У шэрагу зямель дадаткова ідуць перамовы пра павышэнне заробкаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут