Марш справядлівасці
"Сфатаграфаваў аўтазак, які пад'язджаў. Праз пару хвілін я ў ім апынуўся": беларусы падзяліліся з Еўрарадыё сваімі апошнімі фотаздымкамі перад затрыманнем на акцыях пратэсту.
Плошча Незалежнасці. Усё вельмі празаічна.
Зрабілі гэту фатаграфію 20 верасня каля плошчы Перамогі. Праз хвілін 20 мы з сябрам ужо былі ў счэпцы, прыціснутыя АМАПам да сцяны на вуліцы Змітрака Бядулі. А пасля — аўтазак, паўночы ў РУУС і некалькі сутак у Жодзіне з далейшым штрафам.
Фота зроблена на Сурганава за хвілін 15-20 да затрымання і трапляння ў спецтранспарт. Я была сярод апошніх, каго ўзялі, стаяла да канца ў счэпцы. Прапанавалі пайсці самастойна ў якасці альтэрнатывы быць прыцягнутай у транспарт сілай. Давялося, горда падняўшы галаву, прайсці ў аўтазак самой.
Дзяўчына, што стаяла побач са мной, вельмі пазітыўная была, мы хутка разгаварыліся, дагэтуль маем зносіны. Ехалі ў аўтазаку ў цёплай кампаніі, нават вось сэлфі паспелі запіліць (мужчыны ў масках не ацанілі).
Сфатаграфаваў аўтазак, які пад'язджаў. Праз пару хвілін я ў ім апынуўся.
Мы з Віялетай зрабілі сэлфі за паўгадзіны да затрымання. На той момант нас яшчэ ні разу не затрымлівалі. Гэта адбылося 15 ліпеня, падчас чаргі ў ЦВК.
Гэта за 10 хвілін да затрымання. Палічыла гэту карцінку іранічнай.
За 15 хвілін да гэтай фатаграфіі я еў смачныя польскія цукеркі ў рэдакцыі па вуліцы Карла Маркса. Праз 15 хвілін пасля гэтай фатаграфіі — знаёміўся з хлопцамі, да якіх мяне падсялілі ў стакан аўтазака. Фота зроблена на вуліцы Кірава, недалёка ад стадыёна Дынама.
Мяне здзівіла, што так далёка ад мітынгу і так рана пачаліся затрыманні, таму хацеў зафіксаваць гэты момант. Не самая лепшая фатаграфія. 15 сутак за яе — гэта овэр-прайс.
Я зняла, як затрымліваюць журналістку "112 Украина", а потым мяне павялі ў той жа аўтазак.
На фатаграфіі — адзін з першых затрыманых каля Чырвонага касцёла 27 жніўня. Неўзабаве пад'ехаў аўтобус, на якім нас адвезлі ў Кастрычніцкае РУУС.
Гэта фатаграфія і зусім апошняя картка, якую я зрабіў на пратэстах. Праз дзень у мяне анулявалі акрэдытацыю.
Калі вы таксама з тых, у каго ёсць апошняе фота перад затрыманнем, — скіньце яго нам у "Тэлеграм" @euroradio_minsk.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.