8 верасня ў Лідзе стартуе самы буйны восеньскі open-air Беларусі — LIDBEER-2018. У горад прыедуць дзясяткі тысяч чалавек, піва будзе ліцца ракой, музыка — гучаць з кожнага праса, а прадпрымальныя мясцовыя жыхары будуць здаваць кватэры за 100 долараў. Як не згубіцца пасярод гэтага фестывальнага настрою? Еўрарадыё распавядае пра галоўныя моманты фестывалю.
Калі не на ўласнай машыне, то на цягніку, аўтобусе ці маршрутцы.
Што тычыцца квіткоў на цягнікі — яны яшчэ ёсць, хоць і засталося няшмат. У асноўным — у купэ. Зручна даехаць цягніком, які адыходзіць з Мінска а 7-й гадзіне раніцы і прыбывае ў Ліду а 10-й, калі фэст пачынае сваю працу. Хаця працаваць у гэты час будуць яшчэ не ўсе фестывальныя актыўнасці.
У гэтым годзе ў раскладзе таксама з'явіцца дадатковы цягнік, які будзе пушчаны менавіта дзеля таго, каб больш людзей здолела патрапіць на фестываль, а пасля і даехаць да Мінска. Звязана гэта з тым, што ў мінулыя разы вяртацца ў сталіцу пасля фестывалю было цяжка, у выніку чаго сотні маладзёнаў ночылі на чыгуначным вакзале.
Таксама можна яшчэ паспець знайсці квіток і на аўтобус. Давядзецца больш часу правесці ў дарозе, але па квітках варыянтаў нашмат больш.
Даехаць можна і на маршрутцы — хутчэй, чым на аўтобусе, і нават танней. Але тут варта браніраваць усё загадзя — месцаў можа не хапіць.
Таксама зручны варыянт — афіцыйны бас-тур на фестываль. Яго прывабнасць у тым, што, нягледзячы на кошт у 53,5 рублёў, месца на дарогу дадому вам дакладна хопіць. Аўтобусы адпраўляюцца ад станцыі метро Каменная горка ў 10:00, 10:30, 11:00, 11:30 і 12:00. Ад’езд у Мінск запланаваны на 00:45.
Можна пашукаць і спадарожнікаў. У адпаведнай суполцы “УКантакце” ці на адмысловых сервісах.
Калі вы паедзеце на фэст на ўласнай машыне, майце на ўвазе, што на трасе Мінск—Гродна, якая злучае сталіцу Беларусі з Лідай, праводзяцца рамонтныя работы. Таму гэтая дарога да фестывалю можа апынуцца доўгай. Каб пазбегнуць затораў, арганізатары рэкамендуюць альтэрнатыўныя маршруты. Спачатку трэба ехаць па трасе Е30/М1 — 51 км да з'езду на Мір (дарога Р64). Далей, каля Міра, павярнуць на дарогу Р11 і рухацца да вёскі Ганчары, а потым выехаць на трасу Е85, якая прывядзе ў Ліду.
А на гэтай мапе можна пабачыць, што і дзе будзе перакрыта непасрэдна ў Лідзе. І, канешне, паркоўкі.
Адметная рыса фестывалю — тое, што ён адбываецца наўпрост у цэнтры вялікага горада. Вы здолееце бясплатна патрапіць у большасць зон актыўнасцей, пад’есці ў шапіках на фудкорце і нават патанчыць каля “вольнай сцэны”. А вось каб паслухаць хэдлайнераў, давядзецца заплаціць.
Каб дапамагчы наведвальнікам фэсту, арганізатары распрацавалі мапу, дзе пазначаныя шапікі з ежай і півам, кропкі рамеснікаў, сувенірныя крамкі, прыбіральні, банкаматы і паркоўкі. Лепш за ўсё захаваць гэтую мапу на свой смартфон наўпрост зараз — з-за вялікай колькасці людзей мабільны інтэрнет можа працаваць вельмі павольна.
З тым, каб застацца ў Лідзе на ноч, усё складана. Квіткоў на транспарт у бок Мінска хопіць не ўсім, а месцы ў лідскіх гасцініцах на даты фестывалю пачалі браніраваць яшчэ ўзімку. Таму калі вы не аматар начовак на вакзале, захапіце з сабой намёт — і спыніцеся ў спецыяльна адгароджаным кемпінгу, прычым бясплатна! Намётавы лагер пачне сваю працу 7 верасня пасля 15:00, а з’ехаць трэба будзе не пазней за 15 гадзін 9 верасня, на наступны пасля фэсту дзень.
Калі ў вас няма сваёй турыстычнай экіпіроўкі — усё можна арандаваць на месцы. Так, за намёт на дваіх давядзецца заплаціць 14 рублёў, за спальны мяшок — 5 рублёў, а за мангал ды шампуры з вас возьмуць 12 рублёў.
Каб увесь дзень наведвальнікі LIDBEER сілкаваліся грунтоўна, будуць задзейнічаныя 196 шапікаў фудкорту. Там прапануюць не толькі піўныя закускі, снэкі, фастфуд, але і гарачыя абеды розных кухняў свету.
На фудкорце пазначаць шапікі для тых, хто жадае набыць толькі піва, і тыя зоны, дзе ў наяўнасці і напоі, і ежа. Арганізатары звяртаюць увагу, што піць піва дазволена толькі на тэрыторыі фудкорту. Праход з півам да канцэртных пляцовак забаронены.
Яшчэ адной прыемнай нечаканасцю будзе бясплатны 5,5-метровы шашлык! З 14:00 у спецыяльнай зоне каля Лідскага замка яго будуць адначасова смажыць чацвёра кухараў. Госці свята змогуць не толькі паназіраць за працэсам, але і бясплатна пачаставацца рэкорднай закускай.
На LIDBEER будзе працаваць вялікая дзіцячая пляцоўка з аніматарамі, батутам і іншымі забаўкамі, лазертаг для аматараў актыўнага адпачынку, розныя гульні, стральба з лука, луна-парк і цырк Сержа Бандарчука “DZIVA”. Кошт платных актыўнасцей фестывалю — ад 3 да 10 рублёў, квіткі на цыркавыя паказы — ад 10 да 25 рублёў.
Госці фестывалю таксама змогуць пацешыцца квасавым дартсам з нестандартнымі мішэнямі.
Не абыдзецца і без традыцыйных экскурсій на завод “Лідскае піва”. Трапіць на іх змогуць паўналетнія госці LIDBEER, колькасць месцаў абмежаваная. Экскурсійныя групы фарміруюцца ў парадку жывой чаргі з 7:30, а першыя экскурсанты трапяць на завод ужо а 8-й гадзіне. Запіс будзе весціся ля прома-стойкі каля галоўнага ўваходу на завод па адрасе: вул. Міцкевіча, 32.
А вось расклад актыўнасцей на фестывалі:
14:00 — 18:00 Пляцоўка “Афіцыйнае піва LIDBEER. Ідзём на рэкорд”
10:00 — 18:00 Зона “Лідскі квас”
10:00 — 21:00 Інфацэнтр
10:00 — 20:00 Музычныя прадстаўленні вакол Лідскага замка
10:00 — 20:00 Актыўнасці ў зоне сцэны гала-канцэрта
10:00 — 23:00 Сувеніры
18.00 — 20:30 Цырк
12:00 — 22:00 Луна-парк
10:00 — 23:00 Рамеснікі
10:00 — 20:00 Дзіцячая зона
08:00 — 18:00 Экскурсіі на завод “Лідскае піва”
13:00 — 17:00 Інтэрактыўны квэст
На фестывалі будзе адразу дзве сцэны: “вольная” і “гала”.
На вольнай (і бясплатнай) сцэне з 13:00 будуць выступаць маладыя беларускія калектывы — пераможцы анлайн-галасавання. У гэтым годзе сцэна парадуе разнастайнасцю: тут і метал, і фолк, і поп-рок. Госці фестывалю змогуць ужывую паслухаць Yellow Arc 6 — лідараў галасавання, якія адкрыюць гала-канцэрт фестывалю LIDBEER у наступным годзе.
13:00 — 13:30 JOHN CONNOR
13:45 — 14:15 “Тарас на Парнасе”
14:30 — 15:00 Юлія Глебава і “Час Speak”
15:15 — 15:45 “Росы”
16:00 — 16:30 AILLION
16:45 — 17:45 Yellow Arc 6
Каб паслухаць хэдлайнераў, давядзецца пайсці да сцэны гала-канцэрта. Уваход сюды каштуе 30 рублёў, аднак у дзень фестывалю кошт можа змяніцца. Натуральна, у бок павышэння.
На пляцоўку гала-канцэрта гледачы змогуць трапіць з 10:00. Тут усё прадугледжана для камфортнага баўлення часу гасцей з раніцы і да сканчэння канцэртнай праграмы: адмысловая зона актыўнасцей, уласны фудкорт, санітарная зона.
На пляцоўцы ўсталююць спецыяльны памост для камфортнага прагляду канцэрта людзям з абмежаванымі магчымасцямі.
На гала-сцэне выступяць хэдлайнеры фестывалю: Animal DжаZ, Воплі Відоплясова, Ленінград. Расклад выступаў будзе наступным:
17:35 — 18:00 “ЧуVство Полёта”
18:20 — 19:00 Nizkiz
19:20 — 20:20 Animal DжаZ
20:40 — 21:40 “Воплі Відоплясова”
22:25 — 23:45 “Ленинград”
Скончыць праграму фестывалю вялікі феерверк, які ўзляціць у паветра ў 23:45.