Пракуратура Віцебска 29 траўня пачала крымінальную справу на мясцовага жыхара за здзек над дзяржаўнымі сімваламі, інфармуе БЕЛТА.
Трэцяга траўня праваахоўнікі атрымалі паведамленне, што з фасада крамы на ажыўленым праспекце Віцебска знік дзяржаўны сцяг. Ён быў вывешаны ў гонар Свята працы, 1 Траўня.
Праз нейкі час супрацоўнікам міліцыі ўдалося выявіць зламысніка і знайсці палотнішча. Выявілася, што злачынства адбылося ўвечары 2 траўня. 45-гадовы віцяблянін сарваў сцяг і, прыхапіўшы яго з сабой, пайшоў у госці да сяброў.
Крымінальная справа на мужчыну накіраваная для папярэдняга следства ў гарадскі аддзел Следчага камітэта.
Як адзначаюць у пракуратуры, у 2016 годзе справы гэтай катэгорыі ў Беларусі не пачыналіся, у 2017-м — гэта першы такі выпадак.