Анатоль Лапо / БЕЛТА
Польскія сілавікі плануюць захапіць беларускага памежніка, заявіў у эфіры тэлеканала "Беларусь-1" старшыня Дзяржпамежкамітэта Беларусі Анатоль Лапо. У выпадку такога павароту падзей Лапо загадаў страляць без папярэджання.
"Калі я атрымаў інфармацыю, што польскія сілавікі плануюць, магчыма, захапіць беларускага памежніка, я аддаў каманду без папярэджання неадкладна ўжываць зброю", — заявіў Лапо.
Ён лічыць, што польскі бок хоча справакаваць беларускіх памежнікаў "на нейкія меры ў адказ". Ён успомніў, у прыватнасці, аб пашкоджаным памежным знаку.
Інцыдэнт з памежным знакам адбыўся 17 студзеня. Беларускія памежнікі выявілі на шчытку з дзяржаўным гербам прабоіны. Паводле версіі польскага боку, беларусы самі пашкодзілі знак. Польскі бок прапаноўваў калегам правесці нараду і абмеркаваць інцыдэнт, але "беларусы адмовіліся, а ўвечары ў СМІ з'явілася паведамленне аб пашкоджанні беларускага памежнага знака польскім бокам". У Беларусі патлумачылі адмову сустрэцца сітуацыяй з COVID-19 і настойваюць, што польскі бок распаўсюджвае ілжывую інфармацыю.
Са свайго боку памежная служба Польшчы перыядычна паведамляе аб сумнеўных паводзінах на мяжы беларускіх сілавікоў — пра тое, што яны дапамагаюць мігрантам прарывацца праз мяжу. На днях, да прыкладу, паведамлялася пра чарговую такую спробу прарыву каля Мельніка. Тады пацярпеў польскі салдат, яго ўдарылі каменем па галаве.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут